Абхъазым и утыкум жэп­уэгъуэм и 3-5-хэм ще­кIуэкIащ шхыныгъуэхэр щащэ «Яблочный джем» фестивалыр, Налшык къа-лэ администрацэмрэ «Платформа» институтымрэ, «Туризм и индустрия гостеприимства» лъэпкъ Iуэхум хыхьэу къызэрагъэпэщар.

Фестивалыр 2019 гъэм ира­гъэжьащ. Абы щыгъуэм Урысей псом рекорд щагъэуват: утыкум мыIэрысэм къы­хэщIыкIа «алэрыбгъу ира­дзат» и кIыхьагъыр метр 50, и бгъуагъыр метр 20 хъууэ. Ар ягъэхьэзырын папщIэ мы­Iэ­рысэ 175 440-рэ къагъэсэбэпащ. Нэгъабэ къызэрагъэпэща фестивалым хыхьэу ягъэуват мыIэрысэм къы­хэ­щIыкIа арт-объект зэмы­лIэу­жьыгъуэхэр. Абыхэм язт «Сос­рыкъуэ» шхапIэм и теп­лъэр. Мы гъэм нэхъыбэу ягъэ­лъэгъуащ шхыныгъуэ, ерыскъыпхъэ зэмылIэужьы­гъуэхэмрэ IэпщIэлъапщIэхэм я IэрыкIхэмрэ. 
Фестивалыр жэпуэгъуэм и 3-м пщыхьэщхьэм ирагъэ­жьащ Рено Жан и «Шеф»   кинофильмымкIэ. Абы зы­кърезыгъэхьэлIахэм я нэгу зрагъэужьащ Абхъаз Рес­публикэм къикIа TEMOxShiri уэрэджыIакIуэ гупым. 
Жэпуэгъуэм и 4-м сыхьэт  11-м щIидзэу зэхыхьэ гъэщIэгъуэнхэм пащащ. Хабзэ ­хъуауэ, абы щагъэлъагъуэ шхапIэхэм, пщафIэ Iэзэхэм ягъэхьэзыр лъэпкъ шхыны­гъуэхэр, мыIэрысэм къы­хэ­щIыкIа варенэ, джем, ­пхъэщ­хьэмыщхьэ гъэгъуа-хэр ­(чипсхэр), хьэлывэхэр, ­ерыс­къыпхъэхэр къыщIэзыгъэкIхэм ягъэхьэзыр (гъэш­­хэкI­хэр, фо лIэужьыгъуэхэр), IэфIыкIэхэр, псы IэфIхэр, махъсымэхэр. Абы зыкърезыгъэхьэлIахэм Iэмал яIащ я щхьэм щхьэкIи, саугъэт ­папщIэуи зыхуейр къащэ­хуну. Лъэпкъ шхыныгъуэ лIэужьыгъуэхэри куэду   яп­щэ­фIат, джэшлыбжьэ, джэш ­шып­с, шхынгъур, зэ­кIэрыс, хьэлыуэ, тхъу­рыжь,  хъыршын,  ­кофе, шей жыпIэми. Къалэм языныкъуэ и шхапIэхэм ­щапщэфI ерыскъы­гъуэхэри ягъэ­лъэгъуащ. Зэхуэсахэр еплъащ а псом  я IэфIагъыр зыхуэдэм. 
Фестивалым папщIэ къы­зэрагъэпэщат ди щIына-лъэм, къэралым я пщафIэ нэхъ Iэзэхэм ящыщхэм я ­лекцэхэмрэ мастер-клас­схэмрэ. Лъэпщ Заремэ, Ды­щэкI Мухьэмэд, Усманов ­Кенгес, Мокаевэ Гульнарэ, ­Габуев Аслъэн, Бекъшокъуэ Саидэ сымэ ягъэхьэзыра шхыныгъуэхэм зэхыхьэр нэхъри щIэщыгъуэ ящIащ. Абы зыкърезыгъэхьэлIахэр кIэ­лъы­плъащ пхъэщ­хьэ­мыщ­хьэхэм, хадэхэкIым, лыхэ-кIым шхыныгъуэхэр къызэ­рыхащIыкIым. 
IэпщIэлъапщIэхэм цIыхухэр щагъэгъуэзащ хьэпIацIэщыгъэ блэным, мывэ лъапIэхэм къыхэщIыкIа цIуугъэнэхэр гъэхьэзырыным и щэхухэм. Езыхэм хьэзырыххэу къыздаша щыгъэхэм, Iэпщэхъухэм, Iэлъынхэм, сумкэхэм, бохъшэхэм я жармыкIи зэхэтащ. Гуапэт адыгэбзэр хъу­мэным хуащIа открыткэхэр, зыгуэрым узэрыхуэупсэ хъу-ну хьэпшып цIыкIуфэкIухэр, лъэпкъ шхыныгъуэхэр щызэ­хуэхьэса тхылъхэр. Шырыхъу Тамарэ егъэхьэзыр фэм къыхищIыкIа тхылъдэлъхьэхэр, Iэпщэхъухэр, IункIыбзэIуххэр зэребгъэубыд брелокхэр, бохъшэхэр, нэгъуэщIхэри. ГъэщIэгъуэн тщыхъуащ язы­ны­къуэ адыгэ тхакIуэхэм я тхылъ­хэм я цIэхэр, псалъэжьхэр абыхэм зэрытритхар, адыгэ тхыпхъэхэмрэ дамыгъэхэмрэ, уеблэмэ ди лъэпкъым и ныпыр зэрытрищIыхьар. И IэщIагъэкIэ экономистми, илъэситху ипэ­кIэ дэзыхьэха мы Iуэхур лэжьыгъэ нэхъыщхьэ хуэхъуащ. 
Апхуэдэу, фестивалым щIэупщIэ щиIэт Жулабовэ Мунирэ лъэпкъ тхыпхъэхэмрэ дамыгъэхэмрэ къигъэсэбэпурэ пхъэм къыхищIыкIа, зэманым декIуу къигъэ­щIэ­рэщIэжа тхьэгъухэм, Iэлъынхэм, Iэпщэхъухэм, щхьэц­- хэ­Iухэм. Мунирэ мы Iуэхум зэ­рыдихьэхрэ илъэситху мэ­хъу. Абы зэрыжиIамкIэ, и лэжьыгъэхэр Урысейм  и щIыпIэ зэмылIэужыгъуэхэм щыщхэм  ящэху,  Интернетым и со­циальнэ  сайтхэмкIэ ахэр зэбгрегъэкI. 
Фестивалым хэтахэм псом хуэмыдэу ягу дыхьащ удз ­гъэгъа теплъэ зиIэ IэфIы­кIэхэр. Иджыпсту куэд зы­щIэупщIэ хъуа мы саугъэт ­папщIэхэр зыгъэхьэзырхэри Iуэхум жыджэру хэтащ. ЦIыхухэр зыгъэгуфIэ дахагъэхэм ящыщ зыт ахэри. АдэкIэ щыплъагъурт Ново­павловск къалэм щыщу фестивалым кърагъэблэгъа Захарушинэ Аннэ и гуащэ хьэ­лэмэтхэр. Абы жиIащ «Плюшевая лепка» зыфIища и лъэ­щапIэм гуащэхэр илъэс 20-м нэблэгъауэ зэрыщигъэхьэзырыр, и IэдакъэщIэкI фэилъхьэгъуэхэмкIи ахэр зэ­рихуэпэжыр, балигъхэмрэ сабийхэмрэ папщIэ мастер-классхэр зэрыригъэкIуэкIыр, Урысейми, дунейпсо фестивалхэми и лэжьыгъэхэр зэрыщигъэлъагъуэр,  коллекционерхэм илъэс зыбжанэ  хъуауэ ахэр зэрызэхуахьэ-сыр, мы IэщIагъэм ныбжьыщIэхэр зэ­рыхуигъасэр. 
Къалэдэсхэмрэ абы и хьэ­щIэхэмрэ ягу ирихьащ  Аб- хъаз Республикэм и «BLIZKEY» гупым и концертым хыхьэу ягъэзэщIа уэрэдхэр. Ахэр гуапэу зэрырагъэб­лэгъамрэ Iэгуауэшхуэ зэ-ры­хуаIэтамрэ зэрыщыгуфIыкIар, Налшык къэкIуэну зэра­фIэфIыр къыхагъэщащ гу­пым хэтхэм.  Сабийхэм папщIэ нэгузыужь джэгукIэ гъэщIэ­гъуэнхэри щхьэхуэу екIуэкIащ. Апхуэдэу цIыкIухэм щIэщы­гъуэ ящы­хъуащ «Ларамбла» уэрам театрым и артистхэм ята концертхэр. 
Зэхыхьэм къигъэлъэгъуащ республикэм и щIы гектар мин бжыгъэхэм мыIэрысейхэр зэ­ры­щагъэкIыр, бжьы­хьэм мы­Iэрысэ берычэт къы­зэрыпа­чыжыр, абы щIыналъэм ­ис­хэр зэрыригушхуэр. Апхуэ­дэуи гуапэщ пщафIэ Iэзэ­­хэмрэ IэпщIэлъапщIэ­хэмрэ дызэримымащIэр.
Гу зылъыптэращи, фестивалым кIуэ пэтми зеубгъу, нэхъ щIэщыгъуэуи къызэрагъэпэщ, хьэщIэхэм я бжыгъэми хохъуэ. Хабзэ хъуа «Яб­лочный джем» фестивалыр щIызыхашэм и зы щхьэусыгъуэщ зыгъэпсэху­гъуэ махуэхэм унагъуэхэр, благъэхэр, ныбжьэгъухэр зэ­хуэзэныр. Абы и лъэныкъуэкIэ зэхыхьэ гуапэр зи жэрдэмхэм я къалэныр къе­хъулIащ. Махуи­щкIэ екIуэкIа фестивалым къалэдэсхэмрэ абы и хьэ­щIэ­хэмрэ зыщагъэпсэхуащ, я  нэгу зыщрагъэужьащ. Балигъи сабии мы зэхыхьэр фIыуэ   ялъэ­ гъуащи, етIанэгъэ зэре­кIуэкIынум зэрыпэплъэнум шэч хэлъкъым. 

ТЕКIУЖЬ Заретэ.
Сурэтхэр
Къарей Элинэ трихащ.