Республикэм и егъэджакIуэ па­жэхэм ящыщхэр Къэбэрдей-Балъкъэрым и Жылагъуэ палатэм щагъэлъэпIащ. ГуфIэгъуэ щытыкIэм иту къызэрагъэпэща а Iуэхур ирырагъэхьэлIащ ЕгъэджакIуэм и махуэм. 

КъБР-м и егъэджакIуэхэм щехъуэ­хъуа зэхуэсым къекIуэлIащ хэгъэгум и курыт школхэмрэ пэщIэдзэ щIэныгъэ щрагъэгъуэт сабий садхэмрэ я уна­фэщIхэр, гъэсакIуэ-егъэджакIуэ­хэр, жылагъуэм щыщхэр, къулыкъущIапIэ зэмылIэужьыгъуэхэм я лIыкIуэхэр.
КъБР-м и Жылагъуэ палатэм и унафэщIым и къуэдзэ Федченкэ Людмилэ, зэIущIэр къыщызэIуихым, егъэджакIуэхэм гъащIэм щагъэзащIэ къалэныр зэрыин дыдэр къыхигъэщащ.
- Фи дежщ къыщыщIидзэр къытщIэхъуэ щIэблэр жылагъуэм хэзагъэу тэмэму гъэса хъунымрэ дэнэ лъэны­къуэкIи къащыхуэщхьэпэну пэщIэдзэ щIэныгъэ зрагъэгъуэтынымкIэ лэжьыгъэшхуэмрэ. Фэращ къэкIуэнум и лъабжьэр абыхэм яхуэзыгъэтIылъыр. Пэжщ, къэралым илъэс бжыгъэкIэ яхуэфащэ гулъытэ щызымыгъуэтахэм егъэджакIуэхэри ящыщщ. Ауэ, зэхъуэ­кIыныгъэщIэу мы зэманым къэунэ­хуахэм ятетщIыхьмэ, мы Iуэхуми фIы и лъэныкъуэкIэ зэрызихъуэжым шэч хэлъ­къым, - жиIащ Федченкэ Людмилэ.
Кърагъэблэгъахэм хъуэхъу псалъэ дахэкIэ захуигъэзащ КъБР-м и Жылагъуэ палатэм и унафэщIым и къуэдзэ Туменов Мурадин. ЕгъэджакIуэм и лэжьыгъэр абы иригъэщхьащ унэщIэм и ухуэкIэ хъунур архитекторым зэры­зэтригъэпсыхьым.  
- Фи гуащIэдэкIым къыпэкIуэр зыхуэдизыр тыншу къахуэпщытэхэм ящыщкъым. ЩIэблэщIэм, и цIыкIугъуэм къы­щыщIэдзауэ, гъэсэныгъэрэ щIэ­ны­гъэрэ ябгъэдэзылъхьэхэм фрапа­жэщ. Джэлэсу яхэвгъэпсыхьырщ абыхэм тегъэщIапIэу яIэнури, - къыхигъэщащ Туменовым. 
ЕгъэджакIуэхэм псалъэ гуапэхэр ­яжезыIахэм ящыщщ Урысейм Егъэ­джэныгъэмкIэ и академием (РАО) и академик, республикэм и Жылагъуэ палатэм хэт Къарэмырзэ Барэсбий.
- Дэтхэнэ зы егъэджакIуэри, къанэ щIагъуэ щымыIэу, ди сабийхэм я деж зыкъыщызэкъуэзых дуней псо ирокъу. Зэманым къазэрыхуигъэуву, я щIэныгъэм зэпымыууэ хагъэхъуэн зэры­хуейм и мызакъуэу, мы IэнатIэм пэрытхэр я лэжьыгъэм хуэпэжу, уеблэмэ, псэемыблэжу зэрыщытыпхъэри гуры­Iуэгъуэщ. Аращ абыхэм я лэжьыгъэр пщIэ нэхъ зыхуэщIыпхъэхэм щIыхалъытари, - жиIащ Къарэмырзэм.
Урысей Федерацэм и Президентым деж къыщызэрагъэпэща, лъэпкъ зэ­хущытыкIэхэмкIэ советым хэт, Дуней­псо Адыгэ Хасэм и тхьэмадэ Сэхъурокъуэ Хьэутий, къызэхуэсахэм защыхуи­гъазэм, къыхигъэщащ къэралыр зэпIэзэрыт щытыкIэм изыгъэт гуп­сысэкIэ тэмэмыр къытщIэхъуэ щIэблэм яхэпщэнымкIэ егъэджакIуэ-гъэсакIуэхэм я лэжьэкIэ-Iуэху бгъэ­дыхьэкIэм мыхьэнэ ин дыдэ зэриIэр. 
- Фэ ныбжьыщIэхэм ауэ сытми щIэныгъэ ябгъэдэфлъхьэ къудейкъым, атIэ адэкIэ хьэл-щэну яхэлъынури дуней еплъыкIэу яIэнури фоубзыху, - жиIащ абы, егъэджакIуэхэм фIыщIэ тхылъхэмрэ тыгъэ цIыкIухэмкIэ щегуэпылIэм. 
- Нобэ, ди къэралыр гугъуехь мыу­хыжхэм щыхадза зэманым, фэ, егъэджакIуэхэм, фи лэжьыгъэм и пщIэр нэхъри нэхъ лъагэ зэрищIам шэч къытетхьэркъым. КъытщIэхъуэ щIэблэр я гупсысэкIэр узыншэу, хэкупсэу къэгъэхъуным мыхьэнэ ин дыдэ зэриIэр къывгурыIуэкIэрэ, дэтхэнэ фи дерсми къыщыхывогъэщ щIалэгъуалэми, ­балъигъхэми тхуэдэу, дзэ Iуэху хэхам хэт ди лIыхъужьхэм я Iуэху даIыгъын зэрыхуейр, дызэкъуэтмэ, Урысей Федерацэм къэкIуэну дахэ зэриIэнур, - жиIащ КъБР-м и Жылагъуэ палатэм Хэкупсэ гъэсэныгъэмкIэ, щIалэ­гъуалэ политикэмрэ ветеранхэм защIэгъэ­къуэнымкIэ и комиссэм и уна­фэщI, ЛIыгъэм и орденыр зрата Абэнокъуэ Владимир.
ЗэIущIэм хэта езы егъэджакIуэхэми КъБР-м и Жылагъуэ палатэм фIыщIэ хуащIащ, я лэжьыгъэм пщIэ хуащIу, илъэс къэс мыпхуэдэ зэхыхьэ гуапэхэр къызэрызэрагъэпэщым папщIэ.
КЪУМАХУЭ   Аслъэн.