Кёп болмай Огъары Малкъарда  модел китапхана ачылгъанды.   Ол къууанчлы ишге КъМР-ни культура министри  Мухадин Кумахов, орунбасары Къарчаланы Аминат, Черек районну администрациясыны башчысы Къулбайланы Алан,  Лескен районну администарциясыны башчысыны  социал соруула жаны бла орунбасары  Люсена Насипова эм башхала да къатышхан эдиле.

Эсге сала айтсакъ, ол Черек районда  экинчи объектди. Аны къурулушуна сегиз миллион сом къоратылгъанды. Анга энчи мебель,   оборудование эм компьютерле да алыннгандыла. Андан сора да, алты жюз минг  сомгъа тынгылы ремонт бардырылгъанды эм  миллион бла жарым чакълы  китапдан къыстырыкъ этилгенди. 

Мында кёпле китап окъугъандан тышында, башхала бла танышыргъа, билим бериу программалагъа,  тюбешиулеге, акциялагъа,  мастер-класслагъа къатышыргъа,  заманларын хайырлы ётдюрюрге онг табарыкъдыла. Китапханада терк ишлеген Интернет болурча да мадарла этилгендиле.

Быллай тюрлю китапхананы элде маданият жашауну тирилтиуде магъанасы уллуду.   Бюгюнлюкде анда жыйырма минг китап сакъланады, ол санда эки минги арт жыллада къошулгъандыла. Окъуучуланы саны да сегиз жюз адамгъа жетеди. 

Китапхананы къууанчлы ачылыуунда сёлеше, КъМР-ни маданият министри Мухадин Кумахов келир жылда Бызынгыда да быллай китапхана къураллыгъын  да билдиргенди.