Дызэрыт илъэсым и щIышылэм – фокIадэм къриубыдэу Налшык къалэм дэт аэропортым цIыхуи 140-м щIигъум Iуэхутхьэбзэхэр ­яхуищIащ. Нэгъабэ и апхуэдэ пIалъэм хузэфIэкIам нэхърэ проценти 10-кIэ нэхъыбэщ ар. 

2024 гъэм Налшык и кхъухълъатэ телъэтыкIыпIэм щызэблэкIащ ­цIы­хуи 164-щIигъу. А илъэсым къриубыдэуи кхъухьэлъатэхэм зы миным нэблагъэ рейсу ягъэзэщIащ, къетIысэхахэри телъэтыкIахэри зэхэту. Дызэрыт илъэсым и мазибгъум ­кърикIуахэм къызэрагъэлъагъуэмкIэ, а бжыгъэм щIрагъэгъунущ мы гъэр икIэм нэсыху.
Къэбэрдей-Балъкъэрым и Iэтащхьэ КIуэкIуэ Казбек жиIауэ щытащ, дызыхуэкIуэ илъэсхэм Налшык и аэропортым щызэблэкI цIыхум и куэдагъым хуэдищкIэ хагъэхъуэн, а бжыгъэр мин 500-м нагъэсын къалэнхэр зэрыщыIэр.
2030 гъэм нэсыху пIалъэ кIыхькIэ зыужьыным ехьэлIауэ щыIэ къэрал стратегием ипкъ иткIэ Налшык и ­кхъухьлъатэ телъэтыкIыпIэм зэхъуэ­кIыныгъэш­хуэхэр ирагъэгъуэтынущ. А лэжьыгъэм хыхьэнущ цIыхухэр щы­зэблэкI терминалыр, кхъухьлъатэхэр щетIысэх-щытелъэтыкI щIы­пIэр зыхуей хуэгъэзэныр. УФ-м и аэропортхэр къэгъэщIэрэ­щIэ­жы­нымкIэ щыIэ къэрал программэм ипкъ иткIэ, абы трагъэкIуэдэну сом меларди 6,1-р федеральнэ бюджетым къыхэкIынущ.
ЦIыхухэр щызэблэкI терминалыр зэIузэпэщ щIыным и япэ Iыхьэр 2024 гъэм гъэмахуам зэфIагъэкIащ. Лэ­жьыгъэхэм хыхьэу, цIыхухэм я шынагъуэншагъэр къызэрагъэпэщу, аэропортым зыщызэрагъэтх, кхъухь­лъатэм зэритIысхьэну щIыкIэхэр автоматикэм хуагъакIуэу, иджырей IэмалыщIэхэр абы къыщагъэсэбэп ­хъуащ. 
1945 гъэм къызэIуахауэ щыта Налшык и кхъухьлъатэ телъэтыкIыпIэр нобэр къыздэсым тIэу зэрагъэпэщыжауэ аращ – ари 1993-рэ, 2016 гъэ­хэм. «Новапорт» холдингым хыхьэ Налшык и аэропортым и телъэ­тыкIыпIэм цIыхухэр щызэблэкI зы терминалрэ, кхъухьлъатэхэр щетIысэх-щытелъэтыкI щIыпIэу зырэ иIэу аращ. Абы къыщетIысэхыфынущ кхъухьлъатэ лIэужьыгъуэу 20-м нэблагъэрэ вертолёту - сыт хуэдэ-ри. 
ИпэIуэкIэ, «РБК Кавказым» зэритхамкIэ, Налшык и кхъухьлъатэ те­лъэ­тыкIыпIэр 2026-2027 гъэхэм къы­зыхуэтыншэу къызэрагъэпэщыжынущ. Абы ехьэлIа проектыр дызэрыт илъэсым ягъэхьэзырынущ, лэжьыгъэхэм сом меларди 7-м нэблагъэ трагъэкIуэдэнущ. Абы щыщу зы мелардыр аэропортыр зыхыхьэ «Новапорт» холдингым, адрейр - къэрал бюджетым къабгъэдэкIынущ.

ХЬЭЩЫКЪУЕЙ Олег.