КъМР-ни от тюшюуге къажау-къутхарыу спортдан биринчилигине от ёчюлтюучюле бла бирге от тюшюуге къажау-къутхарыу службаны жер-жерли бёлюмлерини къауумларында 14 жылдан 18 жылгъа дери жашла бла къызла да къатышхандыла. Эришиуле 24-26 сентябрьде бардырылгъандыла.  Бу жумушла от ёчюлтюучюлени профессионал сынауларын игилендирир эмда бу усталыкъны даражасын кётюрюр мурат бла къуралгъандыла.  
Биринчи кюн эришиулеге къатышханла басхыч бла мекямны 2-чи (14-16-жыллыкъла), 3-чю (17-18-жыллыкъла) эмда 4-чю   (профессионал къутхарыучула) къатларына ёрлеп эришгендиле. Бу къыйын сынаулада Огъары Малкъарда 16-чы номерли от тюшюуге къажау-къутхарыу бёлюмню командасыны келечилери хорламгъа итиниулюклерин кёргюзтгендиле. Чочайланы Мехмет бла Мамайланы Исса  экинчиле болгъандыла. Къызланы арасында уа Токуланы Алеся башхалагъа ал бермегенди. Токуланы Милана уа тамата къауумда 2-чи жерге чыкъгъанды. 
Экинчи кюн спортчула 100 метрге чапхандыла, бу кезиуде уа алагъа от ёчюлтгенде хайырланылгъан шлангны жаяргъа керек болгъанды. Бу сынауда Токуланы Алеся биягъы жетишимли болгъанды, ол  2-чи жерге чыкъгъанды. 15-16-жыллыкъланы арасында уа Токуланы Алина 2-чи болгъанды. 
Ахыргъы эришиуледе уа отну ёчюлтюуде сынауларын кёргюзтгендиле.  Быйыл, былтырча,   Залукокоажеде 9-чу номерли бёлюмню къутхарыучулары биринчи жерге чыкъгъандыла.  Команда эсепде уа Нальчикде энчи от тюшюуге къажау-къутхарыу бёлюмю алчы болгъанды.      
Биринчилик саугъалау бла жабылгъанды. Алчыла кубокла, грамотала, майдалла эм эсде къаллыкъ саугъала бла белгиленнгендиле. 

ТОКЪЛАНЫ Фатима 
хазырлагъанды.