КъМР-ни Сабий эм жаш тёлю чыгъармачылыкъ арасыны «Къоркъуусузлукъну лабораториясы» деген бёлюмю школчулагъа жолда жюрюуню жорукъларындан билдириу ишин жетишимли бардырады.  

Алай бла, бу жол аны келечилери Хабаз бла Кёнделенни мектеплеринде да болуп окъуучулагъа ачыкъ дерсле бардыргъандыла.

Программагъа кёре, сабийле светофорланы аллында, улоу тохтагъан жерледе кеслерин тюз жюрютюрге, велосипедледе учханда бирсилени чырмамазгъа, белгилеге, ызлагъа эм башха шартлагъа да эс бурургъа юйреннгендиле. Аны бла бирге биринчи медицина болушлукъ этерча да билимлерин ёсдюргендиле.

 - Сабийлени саулукъларындан эм жашауларындан багъалы зат жокъду. Ол себепден бизни баш борчубуз ала жолда къоркъуусуз жюрюрча этергеди. Бу жаны бла эм магъаналы ишледен бири уа алагъа баш жорукъланы танытыргъады. «Къоркъуусузлукъну лабораториясы» – бу жаны бла ахшы себеплик этерикди, - дегендиле араны специалистлери да.

Магометланы Сулейман.