ФокIадэм и 25-27 махуэхэм Налшык щыхьэщIащ Адыгэ Республикэм и Камернэ музыкальнэ театр Хьэнэхъу А. А. и цIэр зезыхьэр. Абы и зэхэзекIуэр хеубыдэ «Большие гастроли» урысейпсо Iуэхум. Урысей Федерацэм ЩэнхабзэмкIэ и министерствэм и къэралпсо гастроль-концертым иубзыхуа лэжьыгъэм ипкъ иткIэ, абы зыщIегъакъуэ «Росконцерт» федеральнэ щэнхабзэ IэнатIэм.
Къэбэрдей-Балъкъэрым и Музыкэ театрым хьэщIэхэм щагъэлъэгъуащ Шекспир Уильям и «Много шума из ничего», Сёмин Андрей и «Сказка о времени», Лодянова Галинэ и «Мы эхо друг друга» спектаклхэр, Эгадзэ Едгар и «Ослеплённые» мюзиклыр. Пэшым щIэзу цIыхухэр зэхуимышэсыфами, щэнхабзэр, гъуазджэр фIыуэ зылъагъу налшыкдэсхэмрэ къалэм и хьэщIэхэмрэ яфIэгъэщIэгъуэну абыхэм еплъащ.
ФокIадэм и 26-м пресс-конференцэ ирагъэкIуэкIащ я IуэхущIапIэмрэ я лэжьыгъэмрэ теухуауэ. КъБР-м и Музыкэ театрым и тхьэмадэ Бэрэгъун Владимир журналистхэм яригъэцIыхуащ Адыгейм и Камернэ музыкэ театрым и художественнэ унафэщI, УФ-мрэ АР-мрэ гъуазджэхэмкIэ щIыхь зиIэ я лэжьакIуэ Сулейманов Юнус, Адыгейм и цIыхубэ артисткэ Кириченкэ Иринэ, Адыгейм щIыхь зиIэ и артист Марков Виктор сымэ.
ЗэIущIэм кърихьэлIахэм япэщIыкIэ захуигъэзащ Бэрэгъуным. Театрхэм я зекIуэм, артистхэм я лэжьыгъэр ефIэкIуэн, зыпэрыт Iуэхур цIыху нэхъыбэм ялъагъун папщIэ абыхэм мыхьэнэшхуэ зэраIэм я гугъу ищIащ абы. Апхуэдэуи тепсэлъыхьащ жэпуэгъуэм и 8-12 махуэхэм ди театрыр Адыгэ Республикэм зэрыщыIэнум, абы спектаклиплI зэрашэнум.
- ЩIыпIэ зыбжанэм дыщыIащ ди лэжьыгъэ тшэурэ. Ауэ дыздэкIуахэм я нэхъыфIхэм, я нэхъ гуапэхэм ящыщщ ди къуэш Къэбэрдей-Балъкъэр Республикэр, - жиIащ Сулейманов Юнус къаша спектаклиплIым кIэщIу я гугъу ищIа нэужь. – Музыкэ театрыр куэд щIащ, зы илъэс 35-рэ хъу къыщIэкIынкIынщ, зэрысцIыхурэ. Молэ Владимир макъамэ зыхуитха «Къамботрэ Лацэрэ» згъэувауэ щытащ. Владимири зэрыжиIащи, театрхэр я пIэм имысу нэгъуэщI щIыпIэхэм кIуэныр, зыкъыщагъэлъэгъуэныр IуэхуфIщ. Уи лэжьэкIэр нэгъуэщIхэм ялъагъу, уэри къыпхуэщхьэпэн куэд абыхэм къыбох. Псалъэм и хьэтыркIэ, Налшык и дахагъэр, ди къуэш республикэм и цIыхухэм я гуапагъэр иджыри зэ си нэгу зэрыщIэкIам сыщогуфIыкI.
Кириченкэ Иринэрэ Марков Викторрэ я лэжьыгъэхэм тепсэлъыхьащ, спектаклхэр зэмылIэужьыгъуэурэ гуп щхьэхуэхэм зэрагъэувым кIэлъыплъыну театреплъхэм Iэмал зэраIэр жаIащ. Апхуэдэуи къызэхуэсахэм Виктор яригъэлъэгъуащ щIалэ цIыкIур Адыгэ хабзэм зэрыщIэппIыкIынум теухуа усэ тхылъ цIыкIур. Ар зыфIэгъэщIэгъуэн щыIэмэ, театрым къызэрихуигъанэр жиIащ.
Журналистхэм я упщIэхэм жэуап щратым хьэщIэхэм къыхагъэщащ Адыгейм и концерт зэгухьэныгъэм хагъэхьа гупийм языхэзу Камернэ музыкэ театрыр зэрыщытым и фIыгъэкIэ, спектаклхэр гъэувынри цIыху къешэлIэнри нэхъ тынш зэрыхъуар. ЦIыху щибл зыщIэхуэ пэшым щIэзу щыщIэмыс къызэрымыхъур гъэщIэгъуэнщ икIи гуапэщ, уи гуащIэр зэрымыпщIэншэр зэрызыхыуигъащIэми шэч хэлъкъым. ДауикI, абы кърихьэлIэхэр хэгъэрейхэм я закъуэкъым, куэду къокIуэ студентхэр, республикэм зыгъэпсэхуакIуэ щыIэхэр, нэгъуэщIхэри. ЖыпIэнурамэ, гъуазджэр фIыуэ зылъагъухэри, абы щIэпIыкIын хуей щIалэгъуалэри. Гугъуехь нэхъ ину яIэр артистхэр къэгъуэтынырщ, сыту жыпIэмэ, ГъуазджэхэмкIэ институтымрэ абы ЩэнхабзэмкIэ и колледжымрэ хуэдэ зиIэ Къэбэрдей-Балъкъэрым ещхьу, къызыхахын щыIэкъым. Театрыр 1993 гъэм къызэIуахауэ щытащ, щэнхабзэм и министрым и унафэкIэ абы и тхьэмадэу ягъэуват музыкэ театрым и режиссёр IэщIагъэ зиIэ Сулейманов Юнус икIи илъэс 32-рэ хъуауэ гупым и пашэр аращ.
Дыпэплъэнщ ди республикэм и Музыкэ театрыр Мейкъуапэ щыкIуэнум. Я лэжьыгъэхэр абы щыпсэу лъэпкъхэм ягу дыхьэну дыщыгугъынщ.
Тхыгъэри сурэтри ИСТЭПАН Залинэ ейщ.
