КъМР-ни Парламентини президиумуну жыйылыуунда Роберт Бибердович Журтовну законла чыгъарыучу органны Аппаратыны башчысына сайлагъандыла.
«КъМР-ни Парламентини юсюнден» республикалы законну 21-чи статьясына эмда Регламентге тийишлиликде, законла чыгъарыучу органны Аппаратыны башчысына Роберт Журтовну кандидатурасын Парламентни башчысы Татьяна Егорова кёргюзтгенди.
Аны бла депутатланы шагъырей эте, Татьяна Борисовна Роберт Бибердовични къурау эм башчылыкъ этиу органла сынауу уллу болгъанын айтханды.
Роберт Бибердович Журтов 1962 жылда Нальчикде туугъанды. Къабарты-Малкъар къырал университетни тауусханды, «правоведение» эм «экономика» усталыкълагъа кёре билим алгъанды. Ол комсомол эм партия органлада кёп жылланы ишлегенди, КъМАССР-ни Госпланында экономист болуп ишлегенди, Ленин районну финанс бёлюмюне, ызы бла Нальчикни мюлкюню фондуна таматалыкъ этгенди.
– Роберт Бибердовични власть органланы битеу бёлюмлеринде да уллу сынауу барды: представительный, толтуруучу, сюд органлада да,- дегенди Татьяна Егорова.
Законла жарашдырыу жаны бла сынаууну юсюнден да айтханды. Роберт Журтов КъМР-ни Парламентини биринчи чакъырылыуунда Республика советни депутатына сайланнганды, законла жарашдырыу, право низам, къоркъуусузлукъ эм инсанланы эркинликлери жаны бла комиссияда профессионал халда ишлегенди. Дагъыда жарашдырыучу судьяны къуллугъунда кёп жылланы ишлегенди, хунери, иш кёллюлюгю ючюн саугъала бла кёп кере белгиленнгенди.
– Бу шартлагъа таянып, Роберт Журтовну кадидатурасын кёргюзтеме. Аны сынауу бу къуллукъда хайырлы ишлерге себеп боллукъду,-дегенди спикер.
Жамауат къоркъуусузлукъ эм коррупциягъа къажау комитетни башчысы Михаил Кривко, Роберт Журтов сюд органлада жыйырма жылдан артыкъ ишлегенин белгилеп, аны профессионал билимине КъМР-ни Баш сюдю иги багъа бергенин чертгенди.
Парламентде фракцияланы башчылары да кандидатура жанлы сёлешгендиле. Алай бла депутатла бирча къол кётюрюп, Роберт Журтовну КъМР-ни Парламентини Аппаратыны башчысына къабыл кёргендиле.
КъМР-ни Парламентини иши Аппаратны хайырлылыгъына кёре къуралгъанын белгилеп, Татьяна Егорова Роберт Бибердовичге жангы къуллукъда жетишимле тежегенди.
Ызы бла депутатла башха сорууланы сюзгендиле. КъМР-ни Административ бузукълукъланы кодексини эмда «Билим бериуню юсюнден» республикалы законну 10-чу статьясына тюзетиулени сюзгендиле.
Законланы проектлери КъМР-ни Парламентини кюз арты сессиясыны планына къошулгъандыла эмда сейирлери болгъан органланы бла организацияланы къарауларына берилгендиле.
Президиумда федерал законланы проектлерине бла Россейни субъектлеринде законла чыгъарыучу органланы башламчылыкъларына да къаралгъанды.
Тюрлю-тюрлю соруула бёлюмде законла чыгъарыучу орган бардыргъан контроль-аналитика жумушланы эсеплери сюзюлгендиле.
Аграр соруула, табийгъатны хайырланыу, экология эм тёгерекдеги къудуретни сакълау жаны бла комитетни башчысы Артур Текушев «КъМР-де эллени комплекс айнытыу» къырал программаны жашауда бардырыуну юсюнден» соруу сюзюлгенден сора чыгъарылгъан эсгертиуле къалай толтурулгъанларын билдиргенди.
Промышленность, транспорт, связь эм жол мюлк комитетни башчысы Марат Калмыков а «правительстволу сагъатда» «КъМР-де жолда жюрюуню къоркъуусузлугъун эм болумун игилендириуню мадарларыны юсюнден» соруу сюзюлгенден сора этилген эсгертиуле къалай тамамланнганларын айтханды.
Искусстволаны Шимал-Кавказ къырал институтуну юбилейини аллында парламентарийле вузну бир-бир келечилерин билим бериуню айнытыуда къыйынлары ючюн Парламентни Сыйлы грамотасы бла саугъаларгъа оноу этгендиле.
КъМР-ни Парламентини пресс-службасы.
