Бжьыхьэм и теплъэ зызыхъуэжыр

КъБР-м и Лъэпкъ музейм и пэшышхуэм  «Бжьыхьэ. Фэеплъ» зыфIаща гъэлъэ­гъуэныгъэ щокIуэкI. Хабзэ ­хъуауэ, ар къы­зэрагъэпэщ КъБР-м и Къэ­ралыгъуэмрэ къалэм и махуэмрэ ирихьэлIэу.

Музейм щагъэлъагъуэ сурэтыщI 52-м я лэжьыгъи 100-м щIигъу (живопись, графикэ, скульптурэ, монументаль­нэ гъуазджэ, уп­щIэм, ятIэ гъэжьам, пхъэм къы­хэщIыкIа хьэпшыпхэр, Iэщэхэр, дыщэ-ды­жьын­хэкIхэр). Лэжьыгъэхэр я теплъэкIи, плъы­фэкIи, инагъ-цIыкIуагъкIи зэщхьэщокI. Мы­хэр сурэтыщI Iэзэхэмрэ иджы дыдэ IэщIагъэм япэ лъэбакъуэ хэзычахэмрэ я IэдакъэщIэкIщ. 
Хэку зауэшхуэм хэкIуэда зауэлIхэм, нарт эпо­сым къыхэщ лIыхъужьхэм, адыгэ пща­щэхэм,Iуащхьэмахуэ, гъэм и зэманхэм, удз гъэгъахэм, нэгъуэщIхэми траухуа сурэтхэр ящIащ Ездэч Владимир, Бгъэжьнокъуэ ­Заурбэч, Тхьэзэплъыж Руслан, Иванниковэ Ольгэ, Иевлевэ Оксанэ, Ваниевэ Раисэ, Сорокин Сергей, Куп Эльмирэ, Ермолаевэ Аннэ, Палецкая Евгение, Жылэ Анатолэ, Джанкишиев Алий, Мазло Руслан, Маргъущ ­Анатолэ, Дзэгъэл Iэуес, Янин Александр, Акъ­­сы­рэ Викторие сымэ. Лэжьыгъэхэм къ­ы­­щы­гъэлъэгъуэжащ псыежэхым хуэдэ гъа­щIэм и теплъэгъуэхэр, цIыхухэм я сурэтхэр.
Гъэлъэгъуэныгъэм хуэфащэ увыпIэ щаубыдащ иджырей гъуазджэм и унэтIыныгъэхэми. ХьэцIыкIу Милэ ятIэ гъэжьам къыхищIыкIа и хьэкъущыкъухэмрэ ГъукIапщэ Арсен и скульптурэмрэ сыт и лъэныкъуэкIи удэзыхьэхщ.
Нэхъыщхьэу мы гъэлъэгъуэныгъэр зытеу­хуар бжьыхьэм и теплъэ зызыхъуэжырщ. Аращи, сурэтхэм щынэрылъагъущ республи­кэм и щIыуэпсыр гъэм и сыт хуэдэ зэманми, махуэми жэщми зэрыдахэр. ГъэщIэгъуэнракъэ, ахэр плъэгъуа иужь, «къытезгъэзэжу сеплъащэрэт» жыуагъэIэу малъхъэдисым хуэдэу узэщIашэ. СурэтыщIхэм Къэ­бэрдей-Балъкъэрым щыпсэухэмрэ и щIы­уэпсымрэ хуаIэ лъагъуныгъэ иныр уздеплъ­ къудейм къыппкърыхьэу къыщIэ­кIынущ. 
ЗэрыжытIащи, мыбдеж щагъэлъагъуэ лъэпкъым къыдэгъуэгурыкIуэ щэнхабзэ ­хъугъуэфIыгъуэхэми щыщ. Ар адыгэм зэрихьэ Iэщэ-фащэхэрщ, хьэзырхэрщ, дыщэ, ды­жьын бгырыпххэрщ, бгъэIулъхэрщ, бзылъ­ху­гъэ­хэм зэрызагъэдахэ цIуугъэнэхэрщ, ар­джэн­хэрщ. Дыщэ IуданэкIэ хэдыкIа, ды­щэи­дэ­ щIа къэлътмакъхэм, хъыджэбз ­хьэ­п­шып­хэм къыпхузэIуах лъэпкъым къы­дэ­гъуэгурыкIуэ тхыпхъэхэм я дахагъэр. Абыхэм къахощ адыгэм и блэкIар, и тхыдэ гъуэ­гуа­нэр, и щэнхабзэ, гъуазджэ хъугъуэфIы­гъуэр.
Гъэлъэгъуэныгъэр къыщызэIуахым зрагъэхьэлIащ республикэм и сурэтыщIхэм, ­гъуазджэр фIыуэ зылъагъухэм, къалэм и хьэ­щIэхэм. Лэжьыгъэхэр фокIадэм и 17 пщIондэ ягъэлъэгъуэнущ. 
ТЕКIУЖЬ Заретэ.

Поделиться:

ЧИТАТЬ ТАКЖЕ:

11.04.2026 - 15:02

Парламент зэдэлэжьэныгъэм зрагъэужь

Къэбэрдей-Балъкъэрым лэжьыгъэ IуэхукIэ къэкIуащ Осетие Ищхъэрэ - Алание Республикэм и Парламентым и лIыкIуэ гуп.

11.04.2026 - 09:03

ЩIыхэр зэрагъэзахуэ

Къэбэрдей-Балъкъэр Республикэм и муниципальнэ щIыналъэхэм я советым хэтхэм я зи чэзу зэIущIэр ды­гъуасэ КъБР-м и Правитель­ствэм и Унэм щрагъэкIуэкIащ.

10.04.2026 - 09:03

«Уэшхым и цIыху»

КъБР-м и Лъэпкъ музейм що­-кIуэкI «Уэшхым и цIыху» урысей­- псо фестивалым хыхьэу къызэ-рагъэпэща гъэлъэгъуэныгъэр.

10.04.2026 - 09:03

Чувашхэр ди хьэщIэщ

Темыркъан Юрэ и цIэр зезыхьэ Къэрал концерт гъэлъэгъуапIэм иджы­благъэ пшыхь гукъинэж ще­кIуэкIащ. Ар теухуауэ щытащ 2026 гъэр Урысейм и лъэпкъхэм я зэкъуэты­ныгъэм и илъэсу зэрагъэувам.

10.04.2026 - 09:03

Хашэ дуней телъыджэм

КъБКъУ-м Дунейпсо егъэ­джэныгъэмкIэ и школ нэхъыщхьэм щекIуэкIащ Тыркуменистаным и щэнхабзэм и махуэ.