Жыл сайын Къабарты-Малкъарны  питомнигинде миллионнга жууукъ терек бла юлкю зыгытла  ёсдюрюледи. Аланы иги кесеги агъач фондну айнытыргъа хайырланыладыла.

«Экология» миллет проектге кирген  «Агъачланы сакълау» федерал  проектге кёре «Агъачланы сакълайыкъ» деген битеуроссей акция жыл сайын бардырылады. Ол 2019 жылдан бери саулай къыралда экология жаны бла эм уллу башламчылыкъладан бирине саналады.

Бюгюнлюкде специалистле терекчикле орнатылыргъа керек жерлени белгилегендиле. Ол санда аланы ташдан, агъачдан тазалап,  хазыр этгендиле.  Жууукъ заманда алада акъагъач, кюйрюч, эмен, чинар терекчикле орнатыллыкъдыла.

Быллай жумушланы кезиуюнде  аслам эс  алыкъа кюч алмагъан  гитче терекчиклеге да  бёлюнеди. Ала иги ёсюм алгъынчы, тамырларын жерге теренирек жибергинчи, тёгереклерин хансдан, къаурадан эмда башха затладан   тазаларгъа  керекди. Ол а  кёбюсюнде къол бла этиледи.  

Эсге сала айтсакъ, республика жыл  сайын акциягъа тири къатышады. Къыралны эм уллу табийгъат байлыкъларындан бирин - агъачны сакълау - болмагъанча ахшы башламчылыкъды. Анга къошумчулукъ этген а бютюн игиди. Быллай жумушланы юслеринде биригип, къыралны эм республиканы да  агъач фондларын  байыкъландырыргъа жарарыкъды.  Терекчикле кислород бергенлеринден тышында хауаны, заранлы углероддан тазалайдыла, аны осал жанына тюрленмезине себеплик этедиле.

Быйыл кюз артыны ахырына дери саулай къыралда 70 миллион терекчик орнатыллыкъды.

Магометланы Сулейман.