Севастопольда Россейни Югуну миллетлерини XVI регионла аралы маданият эм спорт фестивалында садакъдан атдырыуда эм кючлюле республикабызны келечилери болгъандыла. Анда усталыкъларын студентле Яна Кулюшина бла Инал Гурижев, сора Къабарты-Малкъар къырал университетни педагогика колледжини преподаватели Наталья Кулюшина кёргюзтгендиле, ала эришиуден «алтын» бла къайтхандыла.

Фестиваль бардырылгъан битеу заманны ичинде эм иги кёрюмдюню Яна Кулюшина кёргюзтгенди – ол илишаннга 93 метр узакълыкъдан тюшгенди, алай бла анасы эм тренери Наталья Кулюшинаны рекордун озгъанды. Аны бла байламлы Наталья къызыны жетишими бла ёхтемленнгенин, 14 жылны ичинде былай ол биринчи атдыргъанын билдиргенди. «Бизни къауум эришиуге келсе, битеу къалгъан спортчула къытаргъа къыйын боллугъун, айхайда, ангылайдыла. Фестиваль 2011 жылдан бери къуралады да, хорламны бир да ычхындырмагъанбыз. Республикабызда садакъдан спортну устасына кандидатны даражасында атдыргъан умутландыргъан спортчула асламдыла. Спортну бу тюрлюсюнден энчи школ ачып, айнырыбызгъа ийнанама, аны ючюн бизни битеу онгларыбыз бардыла», - дегенди ол.

Фестивальда садакъдан атдырыуда жорукъла тёрелидиле, уллу эришиуледечадыла. Жангызда мында садакъны илишанны туура этген прицеллери жокъду, мишеньни узунлугъу 80 сантиметрди. Тиширыула 21 метрден атдырып башлайдыла, илишаннга тюшерча 3 кере атдырыргъа эркин этиледи. Акъырын-акъырын 21 метрге хар кереден ючюшер метр къошула барады. 

 Бусагъатда уа университетни спортчулары жангы эришиулеге хазырланадыла. Жууукъ заманда, 21 сентябрьде, Яна Кулюшина кесин Къазанда РФ-ни Генеральный прокуроруну кубогунда сынарыкъды, анга уа къыралыбызны жер-жерлеринден 600-ге жууукъ мараучу къатышырыкъдыла.

Кульчаланы Зульфия.