Къэрэшей-Шэрджэс Республикэм и махуэмрэ Черкесск къалэр илъэс 200 зэрырикъуамрэ щагъэлъэпIа дауэдапщэхэм хэтащ КъБР-м и Iэтащхьэ КIуэкIуэ Казбек. 

«Зи юбилейр зыгъэлъапIэ къалэм сыщыIэу, Къэбэрдей-Балъкъэрым къыб­гъэдэкIыуи, си щхьэкIи къуэш ­щIыналъэм и унафэщI Темрезов Рашид ­Бориспий и къуэмрэ КъШР-м щыщхэм­рэ сехъуэхъуащ тхыдэ гъуэгуанэ къэ­зыкIуа а махуэ лъапIэхэмкIэ, - щетх Iэтащхьэм и напэкIуэцIым. - Къэрэшей-Шэрджэ­сыр псынщIэу зызыужь, зэманым декIу, ди къэралым и щIыпIэ дахэ дыдэхэм ящыщщ, я щэнхабзэ къызэ­рымыкIуэри, гъунэгъу хабзэри, зэныбжьэгъугъэри щахъумауэ. А псори республикэм ис цIыхубэр я къару емыблэжу зэрыла­жьэм, фIымрэ ехъулIэныгъэмрэ зэры­хуеIэм и фIыгъэщ. 
КъШР-м и къалащхьэм и махуэшхуэр ирихьэлIащ ТекIуэныгъэ Иныр илъэс 80 щрикъу илъэсым. ЦIыхубэм ягу къагъэкIыж Гитлер и пыхъуэпышэхэм яте­кIуа я нэхъыжьхэм зэрахьа лIыгъэр. Иджыпсту ди къэралыр къахъумэу, щIыналъэ псоми къикIахэр зэкъуэту щызауэ дзэ Iуэху хэхам и губгъуэм итхэм я дежкIэ щапхъэшхуэщ абыхэм я зауэлI тхьэрыIуэмрэ Хэкумрэ зэрагъэпэжар. 
Къэрэшей-Шэрджэсым и цIыхубэм гурэ псэкIэ сохъуэхъу ехъулIэныгъэ, ефIэкIуэныгъэ яIэу, дэтхэнэ махуэми фIыгъуэ къыхуздахьу псэуну!»