КъМР-ни Башчысы Казбек Коков республикада жашагъанлагъа Тырныаууз шахарда ырхыдан къорууланыу жангы системаны къурау жаны бла ишни юсюнден билдиргенди:
– Специалистле – алимле, проектировщикле, инженерле бла бирге Тырныаууз шахарда ырхы кетерча эмда улоу ызланы тынгылы жангыртыу бла байламлы сорууланы андан ары тинтебиз. Баш борч – келлик онжыллагъа алгъа Гирхожан суу бла келген ырхы бла байламлы жарсыуланы кетериудю, – деп жазгъанды ол социал сетьде кесини каналында.
Публикацияда бусагъатда 10 жууукъ концепция хазырланнганы билдириледи. Аланы араларында – ырхы келген каналны кенгертиу, аны къурамын кючлеу, ётдюрюу онгларын эркинирек этиу. Транспорт инфраструктура жаны бла онгланы араларында – лоток тюбюнде тоннельни ишлеу неда жангы кёпюрню тартыу, ол санда вантовой конструкцияны эмда башхаланы хайырланыуну амалларына да къарап.
– Жууукъ заманда бегирек келишген оноуланы белгилерикбиз, андан сора тийишли ишлени башларыкъбыз. Дагъыда аны бла бирге шахар тийреде Басхан черекни сол жагъасында асфальт-бетон салыннган башха толу маршрут ызны къурар умутлубуз, – дегенди республиканы оноучусу.