Нальчикни зоопаркы тапландырыла барады. Анда бола тургъан тюрлениуле къараучулагъа, жаныуарлагъа хайырлыдыла. Сёз ючюн, быйыл, жай башланнганда, жыртхыч жаныуарланы бир къауумлары эркин жерлеге кёчюрюлгендиле. Алыкъа кёчмей тургъанлагъа да жангы «юйле» ишленедиле.
Чалдиш бла бегитилген жерледен биринде амур эмда бенгал къапланла турадыла. Экинчисинде бенгал акъ къапланчыкъла кечинедиле. Ала алгъаракълада сатып алыннгандыла. Ючюнчюсюнде уа эки тиши къаплан бла арслан бардыла.
– Ала туугъан кюнлеринден бери да бирге ёседиле, бир бирлери бла жарашып турадыла. Энди балачыкълары болур деп сакълайбыз, – деп ангылатады зоопаркны директоруну орунбасары Мурат Дышеков.
Арсланланы тёрели юйюрлерине да энчи жер бёлюннгенди. Аладан бири бу зоопаркда туугъанды. Тишисин а башха зоопаркдан арсланнга алышыргъа тюшгенди. Ол алай балалары саулукълу болур ючюн этилгенди.
700 квадрат метрге жетген орунлада жаныуарлагъа тап болурча онгла къуралгъандыла. «Хар орунну жаныуарла къыш турурча, къызыу кюн салкъында солурча, жууунурча да кенг жери, ойнарча майданы бардыла. Къайын тереклери бла жашил айрыкамчыкъла да къуралыпдыла», – деп хапарлайды Мурат Дышеков.
Жулбарсла тургъан орундан узакъ бармай а бёрюлеге бла айыулагъа, къушлагъа бла маймуллагъа бёлюнюрюк жерлени бульдозер тюзете турады. Битеу жыртхыч жаныуарла зоопаркны онг жанына кёчюрюллюкдюле. Аланы орунларында уа хайыуанла кечинирикдиле.
– Эсибиздеди, бир ненча жыл мындан алгъа зоопаркга келгенле жаныуарланы туруу халларына жанлары ауруп кетгендиле, аман ийисге да тёзалмай, бурунларын жабып айланнгандыла. «Аны кёрюп туруу артыкъ хычыуун тюйюл эди. Абаданла, сабийле да бери сюйюп келирча, жаныуарлагъа къарагъанларындан сора да, тёгерек-башны айбатлылыгъына, тизгинлилигине сукъланып, гюллени ариу ийислерин сезип кетерча этерге сюе эдик. Аны ючюн а бек алгъа тёгерекге гюлле, юлкюле, терекле салыргъа келишебиз. Мында жылны къайсы кезиуюнде да ёсерик, чагъарыкъ, жашиллей турлукъ, хар келгенни алагъа къарап, кёзлери, жюреклери да къууанырча этерик битимлени сайлай эдик, – деп бардырады хапарын Мурат Дышеков.
Бюгюнлюкде мында кёп тюрлю терекле, юлкюле, гюлле ёседиле. Ала барысы да жаз башында ариу чагъадыла. Гюлле уа ариу ийислерин жайны узунуна жайгъанлай турадыла. Мурат Дышеков айтханыча, алтын тауукълагъа, маймуллагъа деп алма терекле да салыннгандыла. Жангы жолда уа розаланы кёп тюрлюлерин кёрюрге боллукъду. «Ала Краснодар крайдан келтирилгендиле, пион гюллеге ушагъанла уа – Польшадан. Розаланы чалдишленип ёсгенлери уа зоопаркга кирген жерни къатында салыннгандыла. Жолну эки жанында да ёсюп, алайын бютюн ариу этерикдиле. Хау, ала быйыл салыннгандыла, алыкъа гитчеледиле, экинчи жыл чалдишленип, ёрге ёсюп, тийрени жасарыкъдыла», – деп къошханды директорну орунбасары.
Зоопаркны жашиллендириу бла бирге бери келген абаданла бла гитчеле солурча жерле да къураладыла. Жангы ишленнген жолда июньда сабийлеге энчи майдан ачылгъанды. Анда къыллаучала, учарча тёшчюкле, ауузланырча жерле да бардыла.
Холаланы Марзият.
