Ахыр жыллада Россейде жеринден тепдирилмеген мюлкню къагъытларын жарашдырыу эмда эсепге салыу ишде кёп тюрлениуле бола барадыла. Инсанлагъа аллай жумушланы жер участка къайда болсада берирге онг болгъаны бу реформада баш жерни алады. Башхача айтханда, иелик къагъытланы женгил жарашдырыргъа болады, дегендиле Роскадастрны Къабарты-Малкъарда бёлюмюнде.

Айтылгъанны магъанасы неди: жерни иеси неда аны алыргъа сюйген адам, ол участка болгъан жерге бара турмай, кеси къайда жашай эсе да, къагъыт жумушларын анда эталлыкъды. Сёз ючюн, Къабарты-Малкъарда жашагъан инсанла, бирси регионлада аллай мюлкню документлерин мында кесибизде жарашдырыргъа боллукъдула.

«Аны хайырындан адам кёп тюрлю бюрократия чурумлагъа тюберик тюйюлдю, башха регионнга чыгъаргъа, очередьледе сюелирге да керекмейди», - дегенди Роскадастрны Къабарты-Малкъарда бёлюмюню башчысыны къуллугъун толтургъан Юлия Лигидова.

Быллай жумушугъуз бар эсе, аны 8-8662-93-00-17 номер бла жазылып тамамларгъа боллукъсуз. Специалистле сизни приёмгъа жазарыкъдыла, битеу сорууларыгъызгъа жууап берликдиле, документлени къайсыларын эмда къалай хазырларгъа кереклисин да жик жиги бла ангылатырыкъдыла. Айтылгъаныча, сиз очередьде сюеллик тюйюлсюз, заманыгъызны да къоратырыкъ тюйюлсюз.

Улбашланы Мурат хазырлагъанды.