ЩоджэнцIыкIу Алий и цIэр зезыхьэ Къэбэрдей къэрал драмэ театрым щызэхуащIыжащ 88-нэ театр лъэхъэнэр.
Лъэпкъ театрым и репертуарым иджыпсту лэжьыгъэ 30 къызэщIеубыдэ. Абы хохьэ балигъхэми сабийхэ- ми яхуэгъэза лъэпкъ, классикэ, иджырей драматургием щыщ спектаклхэр. КIэух концертым хыхьэу ягъэлъэгъуащ щIэупщIэ нэхъ зиIэ теплъэгъуэхэм щыщ пычыгъуэхэр. Ар къызэрагъэпэщащ 88-нэ лъэхъэнэр зэриухым ирихьэлIэу. Хабзэ зэрыхъуауэ, концертыр театр бжэIупэм уджкIэ щызэхуащIыжащ.
Театрым иджыпсту цIыху 40 щолажьэ. Абыхэм ящыщщ Урысейм, Къэбэрдей-Балъкъэр, Адыгэ, Ингуш республикэхэм щIыхь зиIэ я артистхэр. Спектаклхэм зэгурыIуэу щоджэгу нэхъыжьхэри щIалэгъуалэри.
Театр лъэхъэнэр зэхуащIыжын ипэ абы щагъэува концертым зригъэхьэлIащ Истамбыл къикIауэ ди республикэм щыхьэщIэ Мельгош Юксель. Хэкужьым ар иджы етIуанэу къокIуэри, лъэпкъ театрым фIэфIу макIуэ.
Апхуэдэу, Горький Максим и цIэр зезыхьэ Урыс къэрал драмэ театрми и 88-нэ лъэхъэнэр щызэхуащIыжащ. Театрыр фIыуэ зылъагъу сабийхэри балигъхэри зэхуишэсащ абы бадзэуэгъуэм и 30-м щагъэлъэгъуа, Дежуров Арсений урыс цIыхубэ таурыхъым къытрищIыкIа «Царевна-лягушка» спектаклыщIэм.
- Зэрысабийрэ псоми ящIэ таурыхъым лъабжьэ хуэ-хъуащ пэжыгъэр, шыIэр, гъэгъуныр, хъуэпсапIэм ерыщу хуэкIуэныр. Абы театреплъхэр къыхуреджэ и теплъэмкIэ цIыхур фIырэ IейкIэ зэхамыгъэкIыну, атIэ дэтхэнэми фIагъи щыуагъи зэрыбгъэдэлъыр къалъытэну, - жеIэ лэжьыгъэм и режиссёр, КъБР-м щIыхь зиIэ и артисткэ Толстовэ Еленэ. - Сюжетыр сабийхэри балигъхэри дэзыхьэхщ. Аращ театреплъхэм ар гъэщIэгъуэн щIащыхъури. ЦIыхум и увыпIэ гъащIэм къызэрыщигъуэтыжым теухуащ мы таурыхъыр. Лэжьыгъэм артист тIощIым щIигъу щоджэгу. Роль нэхъыщхьэхэр Толстовэ Марие, Сторожевэ Анастасие, Нэгъуей Заур сымэ ягъэзащIэ. Утыкури артистхэм я фэилъхьэгъуэхэри художник Дэцырхъуей Руза-нэ къызыхуэтыншэу игъэхьэзыращ.
Гъэмахуэ зыгъэпсэхуакIуэ кIуа театрхэм я артистхэр фокIадэм я лэжьыгъэм пэрыхьэжынущ. Театреплъхэм фIыуэ ялъэгъуа спектаклхэри лэжьыгъэщIэхэри бжьыхьэм утыку кърахьэнущ.
ТЕКIУЖЬ Заретэ.
Сурэтхэр Къарей Элинэ трихащ.
