Къабарты-Малкъарны Правительствосуну юйюнде «Мени бизнесим. Мен кесим иш къурап къармашханладанма» деген форум ётгенди. Анга Россей Федерацияны Президентини Шимал-Кавказ федерал округда толу эркинликли келечисини орунбасары Владимир Надыкто, республиканы Правительствосуну Председатели Мусукланы Алий, къырал власть органланы, ишчи биригиулени, бизнесни айнытыу институтланы келечилери, кеслери иш къурап къармашханла да къатышхандыла.
Форумну ишин республикада «Усталыкъдан файда тюшюрюуге» салыннган налог кийирилгенли беш жыл толгъанына жоралагъан эдиле. Аны хайырындан къадар инсан кеслери бардыргъан предпринимательство ишлерин законлу халгъа кёчюрюрге онг тапхандыла. Ол къуру алагъа угъай, регионну социал-экономика жаны бла айныууна да хайырлы болгъанды.
Владимир Надыкто айтханыча, энчи ишни бу халда бардырыргъа жарагъаны бизни къыралгъа магъаналыды. Аны экономикагъа къошумчулугъу игиди, ол кеси да адамлагъа административ тыйгъычлагъа тюбемей предпринимательство бла кюреширге онг береди.
Бюгюнлюкде саулай Шимал-Кавказ федерал округда кеслери иш къурап къармашхан 884 минг инсан барды. Толу эркинликли келечини орунбасары билдиргеннге кёре, бу налог болум 2028 жылгъа дери созуллукъду. Ары дери аны право жаны бла мурдорун къураргъа, быллай инсанлагъа айныргъа, ёсерге онг болуп турурча этерге керекди. «Усталыкъ файда тюшюрюуге» салыннган налог болумну хайырындан аланы кёплери кеслерин предпринимательствода сынап кёргендиле, ишлерин законлу халгъа кёчюргендиле. Бир игиси, аны урунуу келишимни чеклеринде къармашыу бла бирге хайырланыргъа жарайды. Инсан тюшюрген файда уа мобильный приложенияда эсепленип турады.
Мусукланы Алий да Владимир Надыкто айтханны барын да дурус кёргенин, республиканы оноучулары бу бёлюмню айнытыугъа баш магъана бергенлерин чертгенди.
Эсигизге салайыкъ, «Усталыкъ файда тюшюрюуге» налог болум Къабарты-Малкъарда 2020 жылда июльда кийирилген эди. Ызындан келген жылны аллына аны минг бла жарым инсан хайырлана болгъандыла, бюгюнлюкге уа аланы саны 89 мингнге жетгенди.
Буруннгу жыл бла тенглешдиргенде, былтыр ала 1,8 кереге кёп ахча ишлегендиле, быйыл ал алты айны ичинде уа ол 15,3 миллиард сомгъа жетгенди. Къабарты-Малкъарны бюджетине андан (налог бла) 89 миллиондан аслам сом келгенди.
Бу халда ишлегенлени арасында кёпле адамланы эмда жюклени ташыу (такси), логистика, ремонт, маркетинг, ариулукъ этиу, сабийлеге къарау эмда аланы юйретиу бла кюрешедиле, кеслери этген затланы сатадыла, IТ бёлюмде урунадыла.
Къабарты-Малкъарны экономиканы айнытыу министри Рахайланы Борис да, регионну экономикасына аладан иги къошумчулукъ болгъанын чертип: «Бизни борчубуз – быллай инсанлагъа болушлукъ бериу бла къалмай, ишлерин ол халда бардырыргъа сюйгенлени саны бютюнда кёп болурча этергеди», - дегенди.
Аны юсюнден кенгешде кёп кере айтылгъанды, ишлерин бу халда бардыргъанланы, бегирекда анда жаш тёлюню не жаны бла онгдурургъа боллугъун да ойлагъандыла. Кенгешге къатышхан къонакъла да оюмларын эмда жетишимлерин туура этгендиле.
Улбашланы Мурат
