КъМР-ни саулукъ сакълау министри Рустам Калибатов медицина организацияланы башчылары бла бардыргъан кенгешде бу бёлюмню иши бла байламлы магъаналы соруула сюзюлгендиле.

Министр адамланы жыл санларына кёре талай къауумуну ичинде бардырылгъан диспансеризацияны чеклеринде ракны бир тюрлюсюне тинтиулени эсеплери бла шагъырейлендиргенди. Айтханына кёре, озгъан жыл декабрьден бери аллай 30 минги бардырылгъанды, аланы ичинде бу ауруу къозгъалгъан 57 шарт тохташдырылгъанды. Аны хайырындан аш орунда бла чегиледе аллай, сора Крон атлы эмда колит ауруу заманында ачыкъланып багъыладыла.

Кенгешде  дагъыда  «Медицина кадрла» регион паспортну кёрюмдюлерин бла эсеплерин сюзгендиле. Ол бюгюнлюкде бизни республикада медицина учрежденияла специалистле бла къалай жалчытыннганларын туура этеди. Дагъыда быллай адамланы эллеге ишлерге чакъырыр умутда бардырылгъан «Земский доктор/Земский фельдшер» программагъа да уллу эс бурулгъанды.

Темаладан бири – республикада туберкулёз жаны бла эпидемиология болум эди. Аны юсюнден сёлешгенлеринде, ахыр эки бла жарым жылда шартланы сюзгендиле. Анга кёре бу аурууну профилактикасы жаны бла къыйматлы атламла этерге боллукъду.

Халкъны дарманла бла жалчытыугъа да эс бурулгъанды жыйылыуда.

Улбашланы Мурат хазырлагъанды.