Къызыу кюнле тохташхандыла. Бу кезиуде уа от ёчюлтюучюлени  чакъырыуланы саны ёседи - асламында адамла къургъакъ кырдыкны кюйдюрюп, от жайылгъаны бла байламлы.  КъМР-ни От тюшюуге къажау-къутхарыу службасындан бизге билдиргенлерича, озгъан солуу кюнледе аллай жерлеге 31 кере чакъырылгъандыла от ёчюлтюучюле. 

- Бизни келечилерибиз къургъакъ кырдыкны кюйдюрюрге жарамагъаныны, ол хата бла бошалыргъа боллугъуну юсюнден дайым да айтханлай турадыла. Алай адамла уллу кёллюдюле, бизге  тынгыламайдыла,-дегендиле ведомстводан.

  РФ-ни  КоАП-ыны 20.4-чю статьясыны 1-чи кесегине тийишлиликде, кир-кипчикни эм къургъакъ кырдыкны кюйдюргенде жорукъланы бузгъанла жууапха тартылгъанларын эсгертирге тийишлиди. Ол санда инсанлагъа 5-15 минг сом тазир салынады, жууаплы къуллукъчула 40-60 минг сом тёлерикдиле, организациялда уа 300-400 минг сом.

 - Республиканы  хурметли жамауаты! От бла сакъ болугъуз. Кесигизни, мюлкюгюзню да хатадан сакълагъыз.  Алай от къабынса,   «01» (стационар телефон), «101» неда «112» ( мобильный) телефон номерлеге сёлешип, къутхарыучуланы чакъырыгъыз,-деп эсгертгендиле  бизге от ёчюлтюучюле.

Тикаланы Фатима хазырлагъанды.