Къэбэрдей-Балъкъэрым гъавэ Iухыжыгъуэ лъэхъэ­нэр щокIуэкI. Псом япэу ­Iуахыжыр бжьыхьэсэ гъавэрщ. Гуэдзу зэщIакъуэжащ гектар миным щIигъу, хьэуэ гектар мини 6,7-рэ, былымкъэбыстэу гектар ми­ни 2,3-рэ.

ХадахэкI къэкIыгъэхэри кърахьэлIэж. Нащэрэ джэш хъурейуэ гектар мини 2,6-рэ Iуахыжащ. Ахэр занщIэу республикэм и консерв заводхэм ирагъэшащ. Дунейм и щытыкIэри мэкъумэш лэ­жьакIуэхэр зыхуейм хуэдэщ. Абы и фIыгъэкIэ и чэзум ­гъавэри хадэхэкIри кърахьэлIэжыну Iэмал хъарзынэ яIэщ.
Къыхэгъэщыпхъэщ республикэм и мэкъумэш предприятэхэр хъарзынэу тех­ни­кэхэмкIэ къызэрызэгъэпэщар, абыхэм иджыри къа­зэрыхэхъуэр. Къапщтэмэ, япэ илъэс ныкъуэм хозяйс­т­вэхэм трактору 75-рэ, гъавэ зэрыIуахыж комбайну 6 къащэхуащ, IэнатIэр зыхуэны­къуэ Iэмэпсымэ зэмылIэу­жьыгъуэу мы гъэм къаIэ­рыхьар нэгъабэ нэхърэ ­нэхъыбэщ. Машинэхэр Уры­сейм, Белоруссием къыщы­щIагъэкIащ.
Иджырей техникэхэмрэ Iэ­мэпсымэхэмрэ я фIыгъэкIэ мэкъумэш лэжьыгъэхэр зы­хуей хуэгъэзауэ ирагъэкIуэкI, гъавэр хэкIуэдыкIыншэу и чэзум кърахьэлIэж. Псори зэ­хэту иджыпсту республикэм иIэщ трактору мини 6-м нэ­б­лагъэ, гъавэ зэщIэзы­къуэж комбайну 600-м щIигъу, Iу­сы­пхъэр Iузыхыж комбайн лIэу­жьыгъуэу 160-рэ.