Быйыл жангы окъуу жылда Къабарты-Малкъарны тёрт мектебинде «Аш-азыкъ жаны бла къоркъуусузлукъну  эм технологиялы жалынчакъсызлыкъны  жалчытыу» миллет проектге кёре,  агротехнологиялы  классла ачыллыкъдыла.   Анда районладан  сабийле физикадан, химиядан, биологиядан эм математикадан   теренирек окъурча мадар этилликди. Аны бла бирге аслам эс аграрчылыкъ жанына  эм  эл мюлк бла байламлы технологияланы билдириуге берилликди.   Школну бошагъанларындан сора уа, вузгъа льгота бла кирирге онглары боллукъду.

- Бюгюнлюкде республикада уллу сурам болгъан усталыкъладан бирлерине ветеринар, агроном эм инженер-технолог саналадыла. Болсада алагъа кирирге сюйгенлени саны  бек азды. Анга кёре бу жаны бла  уруннгалада кёп жокъдула. Агротехклассла ачылсала, регионну эм къыралны да  тийишли кадрла бла жалчытырча боллукъду, деп билдиргендиле Къабарты-Малкъар къырал аграр университетде.

Алай бла биринчи кезиуде профильли классла  Тырныауузну 1-чи номерли лицейинде, Красноармейскаяны,  Кишпекни эм Кубаны 1-чи номерли школларында ачыллыкъдыла.

Эсге  сала айтсакъ, проектни  КъМР-ни Эл мюлк бла  Жарыкъландырыу эмда илму министерстволары байламлыкъда бардырадыла.  Аны баш магъанасы республикагъа магъаналы  агропромышленный комплексни айнытыргъады.

Магометланы Сулейман.