Налшык и Къэбэрдей уэрамым, «Победа» кинотеатрым и гупэм къит утыкушхуэм деж Iуэхугъуэ хьэлэмэт икIи купщIафIэ къыщызэрагъэпэщащ бэрэ­жьей пщыхьэщхьэм. Ар хуэгъэпсат ди щIыналъэм къыщыдэкI республикэ газетхэмрэ журналхэмрэ цIыхухэм Iэ тра­дзэным къыхуеджэным. 

Пшыхьым кърихьэлIащ КъБР-м бжыгъэхэр зи лъабжьэ зыужьыныгъэмкIэ, связымрэ цIыхубэ коммуникацэхэмкIэ и министр Бозий Аскэр, абы и къуэдзэхэр, «КъБР-Медиа» IуэхущIапIэм и унафэщI Бежан Беслъэн, абы и нэIэм щIэт IэщIагъэлIхэр, «Урысейм и пощт» IэнатIэм ди республикэм щиIэ къудамэм, Налшык ­къалэ администрацэм я унафэщIхэр, IэщIагъэлIхэр, республикэм къыщыдэкI «Адыгэ псалъэ», «Кабардино-Балкарская правда», «Заман», «Советская моло­дёжь», «Горянка» газетхэм, «Iуащхьэмахуэ», «Минги тау», «Литературная Ка­бардино-Балкария», «Нур», «Нюр», «Солнышко» журналхэм я редактор нэхъыщхьэхэр, абыхэм я щIэджыкIакIуэ­хэр, къалэдэсхэм ящыщ куэд. 
Зи цIэ къитIуа редакцэхэм ящыщ дэтхэнэми игъэхьэзырат я къыдэкIыгъуэхэм ехьэлIа плIанэпэ щхьэхуэ. Къэбгъэлъа­гъуэмэ, «Адыгэ псалъэм» къызэригъэпэща стIолым телът газетым и къыдэкIы­-гъуэ щхьэхуэхэм, номер зэхэтхэм, напэ­кIуэцI хэхахэм ящыщ куэд. Апхуэдэуи лъэпкъ газетым и япэ номерыр къы­зэ­рыдэкIрэ илъэси 100 щрикъум ирихьэлIэу дунейм къытехьа «Адыгэ псалъэ - 100» тхылъ купщIафIэр, газетым и «АП» да­мыгъэ цIыкIур зытет тетрадхэр, блокнотхэр, ручкэхэр, IэфIыкIэхэр, нэгъуэщI хьэп­шыпхэри. Фигу къэдгъэкIыжынщи, ахэр щIэджыкIакIуэхэм папщIэ иригъэщIауэ щытащ ди газетым и ныбжьэгъу пэж, ­хэкупсэ нэсу зи дунейр зыхь Тхьэкъуахъуэ Iэуес. А псоми яфIэхьэлэмэту щыгъуазэ зыхуащIащ пшыхьым кърихьэлIа куэ­-дым. 
Зэхуэсыр екIуу, дахэу иригъэкIуэкIащ КъБР-м щIыхь зиIэ и журналист Аттаев ­Азнор. Пшыхьыр къызэIуихыу абы и мурадымрэ и зэхэлъыкIэмрэ Къэбэрдей уэ­рамышхуэм щызэхуэса цIыхубэр щы­гъуазэ хуищIа нэужь, абы япэу псалъэ иритащ «Адыгэ псалъэ» газетым и редактор нэхъыщхьэ, КъБР-м и Журналист­хэм я зэгухьэныгъэм и унафэщI Жыласэ За­урбэч. Ар тепсэлъыхьащ зи пашэ Iэна- тIэм щекIуэкI лэжьыгъэм, адэкIэ къапэ­щылъ къалэнхэмрэ мурадхэмрэ. 
- Ди газетым и лэжьакIуэхэр жэуаплы­ныгъэ лъагэ яхэлъу я IэнатIэм пэрытщ. Догугъу республикэм щекIуэкI гъащIэр лъэныкъуэ куэдкIэ купщIафIэу, екIуу къызэрыдгъэлъэгъуэным, пэжыр зи лъабжьэ хъыбархэр гъэхуауэ, и чэзум ди щIэджыкIакIуэхэм зэраIэрыдгъэхьэным, ди щIыналъэ дахэр зэрыгушхуэ цIыхухэр псоми зэредгъэцIыхуным, - жиIащ Жы­ласэм. - Илъэси 100-м щIигъуауэ къыдэкI ди газетым и пащхьэ къит къалэнхэм ­дапщэщи я нэхъыщхьэщ ди анэдэлъху­бзэр, лъэпкъ хабзэр, щэнхабзэр хъумэ­ныр, абыхэм адэкIи зегъэужьыныр, а псоми къытщIэхъуэ щIэблэр щыгъуазэу, фIыуэ ялъагъурэ пщIэ хуащIу, анэбзэр яIурылъу къэгъэтэджыныр. Зэманым ды­дэбакъуэу, тхылъымпIэм тету къыдэдгъэкIым щIыгъуу, а мурадхэм иджыпсту худогъэлажьэ электрон къыдэкIыгъуэ­хэри. Фыкъыхузоджэ лъэпкъыбзэкIэ къы­дэкI ди газетым Iэ тевдзэну. Адыгэ уна­-гъуэ къэс - «Адыгэ псалъэ»!
Апхуэдэу купщIафIэу утыкум къы­щып­сэлъащ адрей республикэ газетхэмрэ журналхэмрэ я редактор нэхъыщхьэхэу Бжьахъуэ Ранетэ, Конаков Хьэсэн, Къа­ныкъуэ Заринэ, Суановэ Залинэ, Мы­къуэжь Анатолэ, Мамыщ Владимир, До­дуев Аскэр, Аброкъуэ Бэллэ, Жэрыщты Залинэ, Сабанчиевэ Арипэ сымэ. 
Iуэхугъуэ дахэм къриубыдэу уэрам хуитышхуэм щекIуэкIащ цIыху куэд зэкIуэлIа пщыхьэщхьэ жармыкIэ. Апхуэдэуи концерт дахэ ятащ ГъуазджэхэмкIэ сабий еджапIэ №1-м и артист ныбжьыщIэхэмрэ уэрэд жыIэнымкIэ «Иоканта» студием и гъэсэнхэмрэ. КъинэмыщIауэ, пшыхьым хэтащ зэпеуэ, викторинэ хьэлэмэтхэри. Ахэр къэзыхьахэм пщIэншэу Iэ хутрадзащ республикэ газетхэмрэ журналхэмрэ. 

Сурэтыр  Къарей Элинэ  трихащ. 

ТАМБИЙ Линэ.