Сюд приставланы федерал службасыны Къабарты-Малкъарда Управлениясыны Черек районда бёлюмюню таматасы, ич службаны капитаны Башийланы Юсюп аппасы Башийланы Огъурлуну жашы Зашканы эсгереди.

«Мени аппам 1886 жылда Огъары Малкъарда Зарашкыда туугъанды. Уллу Ата журт уруш башланнганда, аны  тамата къарындашларын - Магометни бла Адрахманны - аскерге чакъырадыла. Ызы бла уа июль айда аппамы кесин да.

Ол Совет Союзну Жигити И.Родимцев башчылыкъ этген 13-чю гвардиялы жаяу дивизияны къауумунда къуллукъ этгенди. Биринчиден да анга   Сталинградны къорууларгъа тюшгенди. Ол къазауатны кезиуюнде жаралы да болады. Госпитальдан чыкъгъандан сора, Зашка жангыдан фронтха кетеди,  Ростов, Киев, Польша эмда Чехословакия ючюн сермешеди. Алада жигитлигин, батырлыгъын да кёргюзтеди.

1944 жылны ахырында аппам ауур жаралы болуп, андан сора аскерге къайтыр амалы болмай къалады. Урушда этген жигитлиги ючюн  «За оборону Сталинграда», «За отвагу», «За доблестный труд в годы Великой Отечественной войны», «За Победу над Германией» майдалла бла саугъаланнганды.

Бизни аскерчилерибиз Ата журтларына берген антларына къачан да кертичилей къалгъандыла. Ала  аны толтурмай къоюуну уллу бедишге  санагъандыла. Жууукъ-ахлуларыны жашауларын сакълап, туугъан жерлерин фашист ууучлаучуладан азатлаугъа уа неден да уллу магъана бере, жанларын-къанларын аямагъандыла.

Мен да аппам Башийланы Зашка бла ёхтемлене, анга ыразылыгъымы билдиреме. Аны аллында борчума уа  къаллай аламат адамларыбыз болгъанларын башхалагъа да билдириуню санайма. Ёсюп келген тёлюлеге да быллай юлгюле бек керекдиле.

Башийланы Зашканы юсюнден хапарымы уа былай бошаргъа сюеме: «Биз саубуз, бизни унутмагъан къадарда!» деген сёзлеге: «Жашасынла сыйлы таматаларыбызны атлары арабызда!» деп къошарыкъ эдим».
 

Басмагъа Таппасханланы Аминат хазырлагъанды.