Россейни кюнюнде КъМР-ни Башчысы Казбек Коков республиканы айныууна уллу къыйын салгъанланы бир къауумуна сыйлы къырал саугъаланы бергенди. Анга аталгъан къууанчлы жыйылыу Къабарты-Малкъарны Правительствосуну юйюнде ётгенди.
Кесини алгъышлау сёзюнде Казбек Валерьевич былай айтханды: «Сизни эмда Къабарты-Малкъарны саулай жамауатын къырал байрам бла – Россейни кюню бла – жюрегимден къызыу алгъышлайма. Быллай кюн биз Ата журтубузну – мингжыллыкъ тарыхы, бай хазнасы болгъан, къыйыры-учу кёрюнмеген деменгили тийреде кёп халкъланы бла культураланы бирикдирген къыралны – хурметлейбиз. Анга Россей бирикген, кючлю эмда деменгили къыралча тюбейди. Биз ма анда туугъанбыз, анда ёсгенбиз, ол бизни Туугъан журтубузду. Биз бирге уа бир россейли халкъбыз.
Россейча къырал кючлю болмай амалы жокъду деп, ата-бабаларыбыз аны ючюн кюрешгендиле. Бюгюнлюкде жашагъанла да анга жангы кюч бередиле. Аскер жигитликлери, урунуу жигерликлери бла да Ата журтубузну айныууна бла жашнаууна уллу къыйын салгъанланы Россейни кюнюнде саугъалау да ахшы тёреге ма аны ючюн айланнганды.
Республиканы айтхылы адамларын саугъалау – аланы фахмуларына, чыгъармачы жетишимлерине жамауат уллу сый бергенини белгисиди. Россей Федерацияны Президенти Владимир Путинни Указы бла Зумакъулланы Мустафаны къызы Танзиля «Маданиятны бла искусствону айнытыугъа уллу къыйын салгъаны ючюн» орден бла саугъаланнганды. Аны адамгъа, къыралгъа, туугъан жерине уллу сюймеклиги сезилген чыгъармалары Къабарты-Малкъарны халкъларыны ниет хазналарына къошулгъандыла, аны фахмусуна бизни къыралда, андан тышында да кёпле баш урадыла. Хурметли Танзиля Мустафаевна, Сизни бу сыйлы къырал саугъа бла жюрегимден къызыу алгъышлайма.
Бюгюнлюкде энчи аскер операция баргъан тийреледе кеслерини аскер борчларын бет жарыкълы толтура, Россейни жалынчакъсызлыгъын къоруулай къазауат этген жашларыбызны бир къаууму да белгиленмей къалмагъандыла. Биз ол жигитлерибиз бла ёхтемленебиз, аланы юйлерине сау-саламат къайтырларын ашыгъып сакълайбыз.
Республикабыз энчи аскер операциягъа къатышханлагъа не жаны бла да себеплик этер ючюн къалмайды. Аланы юйюрлерине, жууукъларына бла ахлуларына да тутхучлулукъ этеди. Бу магъаналы ишге къырал эмда жамауат жандауурлукъ фондла, волонтёр къауумла да уллу къошумчулукъ этедиле. Россейни Президентини Указы бла «Ата журтну къоруулаучулары» къырал фондну КъМР-де бёлюмюню таматасы Муаед Дадов бла «Ата журтлуларыбызгъа себеплик этиу жаны бла «Артха бир атлам да этмезге»! деген жамауат биригиуню таматасы Байсыланы Темиржан «Ата журтну аллында къыйыны ючюн» деген 2-чи даражалы орденни майдалы бла саугъаланнгандыла.
«Память в наследство» регион жамауат биригиуню таматасы Мария Котлярова уа «Къабарты-Малкъар Республиканы аллында къыйыны ючюн» сыйлы орденнге тийишли болгъанды.
Къыралны бу къыйын заманында жамауат ишге тири къатышханлары бла тёрели хазналарыбызны сакълаугъа, жамауатны тюз акъыллы къауумун бирикдириуге, халкъыбызны бирлигин кючлеуге себеплик этгенлеге жюрек ыразылыгъыбызны, уллу хурмет этгенибизни билдиребиз».
Казбек Коков саугъаланнганланы араларында саулукъ сакълауда, билим бериуде да ишлегенле болгъанларын айтып, алагъа магъаналы, жууаплы да ишлерин бет жарыкълы толтургъанлары ючюн ыспас этгенди. Маданиятха къуллукъ этгенлени юслеринден айта: «Сизни фахмугъузну, усталыгъыгъызны хайырындан адамланы араларында келишиулюк, бир бирге хурмет этиу да сакъланады. Маданиятыбызгъа, халкъыбызгъа да тюз ниетли къуллукъ этгенигиз ючюн сау болугъуз»,- деп чертгенди.
КъМР-ни Башчысы экономиканы айнытыугъа юлюшлерин къошханлагъа да ыспас этгенди. «Къарыуларын, билимлерин, усталыкъларын да аямай, республиканы алгъа элтген адамларыбыз бла ёхтемленебиз»,- дегенди.
Ахырында, жыйылгъанлагъа айланып, Казбек Коков былай дегенди: «Хурметли шуёхла! Саулай жашауугъуз, сайлагъан усталыгъыгъызгъа кертичилик энчи кюч берген, кёллендирген юлгюдю. Республикагъа, саулай къыралгъа да уллу къыйын салгъаныгъыз ючюн сау болугъуз. Сизнича, арый-тала билмеген, къураучу хунерлери болгъан адамла бла биз, бир команда болуп, Къабарты-Малкъарны эмда Ата журтубузну айнытыр мурат бла салыннган не къыйын борчланы да толтурмай къоярыкъ тюйюлбюз. Анга мен толусунлай ийнанама. Сау болугъуз!».
Алгъышлау сёзюнден сора Къабарты-Малкъарны Башчысы саугъала бериуге кёчгенди. Алай бла, назмучу къызыбыз, Россейни Жазыучуларыны биригиуюне кирген Зумакъулланы Танзилягъа «Маданиятха бла искусствогъа салгъан къыйыны ючюн» - орден, Байсыланы Темиржаннга бла Муаед Дадовха «Ата журтну аллында къыйыны ючюн» 2-чи даражалы орденни майдалы берилгендиле.
Къабарты-Малкъар къырал университетни медицина академиясыны кафедрасыны таматасы Руслан Захоховха «Россей Федерацияны сыйлы врачы» деген ат аталгъанды. «Россей Федерацияны сыйлы ветеринар врачы» деген атха уа Прохладныйде ветеринария араны таматасы Муаед Кумыков тийишли болгъанды.
«Россейни аналары» битеуроссей жамауат биригиуню регион бёлюмюню таматасы Элина Гучапшева эмда «Артист Продакшн» ООО-ну баш директоруну орунбасары Черим Нахушевге жамауатха магъаналы ишлени къурагъанлары эмда бардыргъанлары ючюн Россей Федерацияны Президентини Ыспас къагъытлары берилгендиле.
Ишлеринде жетишимле болдургъанлары эмда кёп жылланы бет жарыкълы уруннганлары ючюн къауум адам Къабарты-Малкъар Республиканы Сыйлы грамотасы бла саугъаланнгандыла. Аланы араларында КъМР-ни промышленность, энергетика эмда сатыу-алыу министрини орунбасары Къулийланы Ахмат, Элбрус районну администрациясыны экономика, прогнозла салыу эмда сатыу-алыу управлениясыны таматасы Аккайланы Светлана, Росгвардияны КъМР-де Управлениясыны энчи буйрукъла толтургъан «Вершина» отрядында къуллукъ этгенлени эсепге алыу, кадрла жаны бла да специалист Бечелланы Елена да бардыла.
Къабарты-Малкъар Республиканы Башчысыны Указы бла къауум адамгъа сыйлы атла аталгъандыла: ол санда музыкант, жырланы автору Тимур Лосанов «Къабарты-Малкъар Республиканы халкъ артисти», «КБР-Медиа» къырал казна учрежденияны «Ошхамахо» журналыны баш редактору Анатолий Мукожев «Къабарты-Малкъар Республиканы халкъ поэти» болгъандыла. КъМР-ни Жазыучуларыны союзуна кирген Сафарби Бейтугановха бла «Эрирей» жырчы къауумну хормейстери, Яникой элни Маданият юйюню директору Бечелланы Хабазгъа «Къабарты-Малкъар Республиканы культурасыны сыйлы къуллукъчусу» деген ат аталгъанды.
«Къабарты-Малкъар Республиканы сыйлы врачы» деген атха тийишли болгъанланы араларында уа ФСИН-ни 7-чи номерли Медицина-санитар бёлюмюню таматасы Бейтуугъанланы Жулдуз да барды.
Черек муниципал районну Ара район больницасыны сабийлеге бакъгъан бёлюмюню медсестрасы Къазийланы Фатиматха, КъМКъУ-ну Стоматология эмда жаякъ-бет хирургия институтуну доценти Батырбекланы Фатиматха «Къабарты-Малкъар Республиканы саулукъ сакълаууну сыйлы ишчиси» деген ат аталгъанды.
«Къабарты-Малкъар Республиканы билим бериуюню сыйлы ишчиси» деген атха тийишли болгъанланы араларында Черек районну Къашхатау элини «Нюр» сабий садыны юйретиучюсю Гуппойланы Татьяна, Искусстволаны Шимал-Кавказ къырал институтуну окъутуу жаны бла бёлюмюню таматасы Жаппуланы Лейла да бардыла.
Къабарты-Малкъар Республиканы Башчысыны атындан 2013-чю аскер бёлюмюню аскерчиси Аттоланы Альбертге, «КъМР-де кёп фатарлы юйлеге тынгылы ремонт этиу жаны бла регион оператор» коммерциялы болмагъан фондну баш бухгалтерини орунбасары Башийланы Мадинагъа, дагъыда ол учрежденияны бёлюмюню таматасы Кючменланы Лолитагъа, абонент бёлюмюню таматасы Уяналаны Камиллагъа эмда башхалагъа ыспас этилгенди.
Юсюпланы Галина хазырлагъанды.
