Бу кюнледе Бабугентде «Зарница 2.0» деген аскер патриот оюнну регион урумуну къууанчлы халда ачылыууна къатышханма, деп жазгъанды КъМР-ни Башчысы Казбек Коков кесини телеграм-каналында.
«Алгъын бизни Президентибиз Владимир Путин озгъан ёмюрню 70-80-чи жыллада битеу къыралгъа белгили оюнну къайтарыуну дурус кёрген эди. Ол оюн сабийлени эмда жаш тёлюню бирикдиреди, аланы оноу этерге итиниулюклерин къозгъайды,тизгинликге тюшюндюреди, бир бирге болушлукъ этерге, жаш тёлюню жигитле болургъа эм Ата журтларын сюерге юйретеди.
Белгилерчады, «Зарница 2.0» Россейни кюнюн белгилегенде бардырылгъанды, ол кёп миллетли россейли халкъны ёмюрледен бери бирликни сакълап келгенини, эркинликни эмда Ата журтубузну къадары ючюн инсан жууаплылыкъны белгисиди. Бу айтылгъан магъаналы затлагъа ёсюп келген тёлюбюзню юйретиу ол бизни барыбызны да борчубузду.
Битеу да быйыл Къабарты-Малкъардан «Зарница 2.0» оюнну регион урумуна къатышыргъа 25 минг адамны эсепге тюшген эди. Ол кёрюмдю болмагъанча къууандырады, нек дегенде быйыл Ата журтну къоруулаучусуну бла Уллу Хорламны 80-жыллыгъын белгилегенибизни эсге алсакъ.
Бизни сабийлерибиз бюгюнлюкде алгъын заманлада жюрютюлген ахшы адетлени бла тёрелени аладыла, къыралны тарыхын унутмайдыла, гиртчиликлерин кёргюзтюп, айныуну жолун сайлап, атларын иги бла айтдырадыла.
Россейни кюнюн эм «Зарницаны» ачылыууна жоралап, анга къатышханла къыралны байрагъыны болмагъанча уллу ёлчемин жайыу бла байламлы акцияны бардыргъандыла эмда Ата журт урушну жигитлерини атлары жазылгъан 100-метрлик байракъны алып баргъандыла.
Сёзсюз, алгъа барыргъа итиннген, хар затха да къайгъы этген шёндюгю жаш тёлюбюз бла биз ёхтемленирге керекбиз. Ала Къабарты-Малкъарны эмда Россейни тийишли инсанларыдыла. Оюннга къатышханлагъа сейирлик эришиулени, жетишим эмда жангы, ышаннгылы шуёхла табарларын тежегенме»,-деп айтылады билдириуде.
