Тыркум и Бурсэ къалэм махуитIкIэ щекIуэкIащ зауэ Iэпщэрыбанэ спортымкIэ цIыхухъухэмрэ цIыхубзхэмрэ я дунейпсо чемпионат. Абы щызэпеуащ къэрал 32-м я спортсмен 300-м нэблагъэ. Урысей Федерацэм и командэ къыхэхам хэту зэхьэзэхуэм щыIащ Къэбэрдей-Балъкъэрым и гъэсэнхэри икIи медалиплI ди къэралым къыхуахьащ, щыр – дыщэу, зыр – домбеякъыу.
Килограмм 80 зи хьэлъагъхэм я деж щызауэ Сомгъур Азэмэт зэIущIищ иригъэкIуэкIати, зэпеуэм хухаха зэманхэр и кIэм нимыгъэсу псоми щытекIуащ и IэзагъкIэ хьэрхуэрэгъухэм фIыуэ зэрефIэкIыр къигъэлъагъуэу. Килограмми 120-рэ зи хьэлъагъхэм я деж апхуэдэ ехъулIэныгъэ щызригъэгъуэтащ Iэрэмысэ Алани.
Ди щIалэхэм закъыкIэригъэхуакъым ди командэм хэта бзылъхугъэ Кныш Рози. Дыщэ медалыр пщащэм щызыIэригъэхьащ килограмм 58-рэ зи хьэлъагъхэм я деж.
ЛIуп Резуан мызыгъуэгукIэ ещанэ увыпIэм къыщыувыIащ.
Гупхэм я зэпеуэм псом нэхърэ щынэхъ лъэщащ Узбекистаным и командэр, етIуанэр УФ-м и спортсменхэрщ, ещанэр Къэзахъстаным икIахэрщ.
Ди щIалэхэр зэхьэзэхуэм хуагъэхьэзыращ КIэрашэ Жамболэт, Тагузлоев Iэдэм, Бэрэгъун Зубер сымэ.
ХЬЭЩОКЪУЭ Алыдж.
