КъМР-ни Правительствосуну Председатели Мусукланы Алий «Жылны экспортёру 2024» битеуроссей конкурсну республикалы даражада хорлагъанланы саугъалагъанды. Анга уа алты номинацияда айырмалыла тийишли болгъандыла.

Алай бла промышленность бёлюмде - «Терекалмаз» АО, аш-азыкъ промышленность жаны бла уа «Нальчик-Сладость» биригиу хорлагъандыла. Агропромышленность жаны бла - «Отбор» урлукъчулукъ ара, бийик технологиялы бёлюмде уа «Антиград» ООО айырмалыла болгъандыла. «Прорыв года» номинацияда «Империал» хорлагъанды, «Эм иги экспортёр тиширыу» деген атны уа «Эльбрус-К» эмда «Фрукт сити» предприятияланы келечилери юлешгендиле.

Шёндюгю къыйын экономика болумлада ишлерин бардырыргъа бла айнытыргъа амал табып кюрешген, республиканы экспорт онгларын да кючлендирген предпринимательлеге Мусукланы Алий ыразылыгъын билдиргенди. «Юч жыл мындан алгъа, тышындан салыннган чеклениулеге да къарамай, республиканы экспортёрлары, онг табып, шуёх къыралла бла сатыу-алыуну кёбейтгендиле. Мындан арысында да жетишимли болуругъузгъа ышанама», - дегенди ол.

Озгъан жылны эсеплерине къарагъанда, Къабарты-Малкъарда буруннгу жылдан эсе 50 процентге кёп экспорт сатыу-алыу этилгенди. Тышына асламысында аш-азыкъ продукция жибериледи.
«Жылны экспортёру» битеуроссей конкурс жыл сайын бардырылады. Аны регион кезиуюнде хорлагъанла ахыр кесегине къатышырыкъдыла. Къыралны айырмалы экспортёрларын а Москвада ётерик «Россейде чыгъарылгъанды» деген халкъла аралы форумда саугъаларыкъдыла.

Улбашланы Мурат хазырлагъанды.