Х.М. Бербеков атлы Къабарты-Малкъар къырал университетде Малкъарлыланы бла къарачайлыланы жигитлик эпосларыны «Нарт Дебетни туудукълары» деген жыл сайын бардырылгъан бешинчи фестивалында хорлагъанлагъа бла призёрлагъа саугъаларын байрам халда тутдуруу къуралгъанды. Бу проект ана тилни сакълаугъа, жаш тёлюню инсанлыгъыны къуралыууна, тарых эсни ёсдюрюуге аталып бардырылады.

Мартны ал кюнлеринден бери 300-ден артыкъ школчу бла студент къарачай-малкъар эпосну билгенлерине тестлени толтургъандыла, эришиуге кеслерини чыгъармачылыкъ ишлерин эмда къол бла жарашдыргъан затларын жибергендиле.

- Нарт эпос Шимал Кавказны халкъларын бирикдиреди. Ол бюгюннгю кюннге дери сакъланып келген тин маданиятыбызны магъаналы кесегинден бириди эмда ол келлик тёлюлеге да жетерге тийишлиди. Аны ючюн бардырабыз быллай эришиулени,- дегенди КъМКъУ-ну Малкъар  маданият арасыны таматасы Байтуугъанланы Исмайыл.

Фестивальны ахыр уруму чыгъармаланы шатык окъуучуларыны конкурсуча озгъанды, анда жаш адамла малкъар, орус, ингилиз, португал, француз тилледе деменгили нартланы юслеринден таурухланы айтхандыла.

Хорлагъанлагъа насийхат сёзлерин Къулийланы Къайсын атлы Малкъар къырал драма театрны директору Жангоразланы Мажит, КъМР-ни Жазыучуларыны союзуну таматасыны орунбасары Беппайланы Муталип. «Нюр» журналны баш редактору Сабанчыланы Арипа, КъМР-ни маданиятыны сыйлы къуллукъчусу Ботталаны Мурат, КъМР-ни маданиятыны сыйлы къуллукъчусу Жолабланы Тахир, Малкъар маданият араны таматасыны орунбасары Тюбейланы Светлана айтхандыла.

Къонакъланы кеслерини чыгъармачылыкълары бла жаш жырчыла Улбашланы Жаннета, Диналаны Саида, Ахметланы Фатима, Ташлы-Тала элни маданият юйюню «Лейсан» вокал къаууму къууандыргъандыла, «Ас-салам» ансамбль ариу тепсеулени кёргюзтгенди.

Жыйылыуну КъМКъУ-ну Малкъар маданият арасы къурагъанын айтыргъа тийишлиди.