Кёп болмай  Ставрополь крайда «МинводыЭКСПО» кёрмюч комплексде баргъан Кавказны экинчи инвестициялы форумунда беш жылны ичинде "Эльбрус" тау-лыжа курортда толусунлай инфраструктураны жангыртырыкъларын  айтхандыла. Ол санда канат жолла ишленирикдиле эм маятник канатканы да бюгюннгю излемлеге келишгени  ишленирикди.   

- Бюгюнлюкде курортда къыстау жангыртыу ишле барадыла. Беш жылны ичинде аны инфраструктурасы  толусунлай жангыртыллыкъды.  Иги жанына тюрлендирмей жарамазлыгъын хар ким да ангылайды. Ол себепден эрттеден ишлеген къонакъ юйле  да бийик стандартлагъа келиширча,  фасадларын айбатландырырча иелери бла келишгенбиз,- дегенди    Кавказ.РФ биригиуню таматасы  Андрей Юмшанов.

Ол айтханнга кёре, биригиу  курортну белгили жерлерин да тап халгъа келтирликди. Анга маятник канатка да киреди. "Шимал Кавказны айнытыу жаны бла институт аны кесине алыр муратлыды. Бюгюнлюкде аны жангыртырча проект жарашдырыла турады, анга этиллик къоранчла белгиленселе,  багъасы бла келиширча боллукъду,- деп къошханды Андрей Юмшанов. 

Эсге сала айтсакъ,  жангыртыу ишлени кезиуюнде маятник канатканы вагонларына къошуллукъ тюйюлдю.   Биригиуню баш борчу адам санын кёбейтирге угъай,  белгили объектни  жашауун созаргъады. Болсада туристлени болумларын игилендирирча башха канат  жолла тартыллыкъдыла. Бюгюнлюкде аланы къурулушлары къыстау барады.  Алай бла  юч-тёрт жылны жылны ичинде ала  хайырланыргъа берилликдиле.

Курданланы Сулейман.