Кадет школлада патриотланы жангы тёлюлерин ёсдюредиле![]() Къабарты-Малкъарны Жамауат палатасыны кезиулю жыйылыуунда кадет школлада окъугъанланы тин-ниет жаны бла юйретиу эмда Ата журтха сюймекликде ёсдюрюу сюзюлгенди. Палатаны билим бериу эм илму жаны бла комиссиясыны башчысы Зумакъулланы Асхат, кётюрюлген сорууну магъанасын черте, кадет школлада низам къаты болгъанын белгилегенди. «Хау, кадетле барысы да артда аскерчиле боллукъ тюйюлдюле, алай эсе да, туугъан жерге кертичиликни бла къуллукъ этиуню мында сингдирилген сезимлери аланы битеу жашауларына къаллыкъдыла», - дегенди ол. Кадет класслада окъутуу бла юйретиу къалай къуралгъаныны юсюнден билдириулени жарыкъландырыу эм илму министрни орунбасары Екатерина Мисостова, 1-чи кадет школну башчысы Альбина Бжекшиева, 2-чи кадет школну директору Гилийланы Мурат этгендиле. Аланы айтханларыны эсеплерин чыгъара, жыйылгъанла Уллу Хорламны 81-жыллыгъында эмда Къоруулаучуну жылында билим бериу управление органла, билим бериуде ишлегенле республиканы жамауат биригиулери бла бирге сабийлени бла жаш тёлюню аскерчи эм конституция кертичиликге, низамгъа, керек кюнде журтубузну къорууларгъа хазырлылыкъгъа, билим алыугъа жууаплы болуугъа, къыралыбызны тёрели тин-ниет хазнасын сакълаугъа юйретиу жаны бла ишни тирилендиргендиле. Юлгюге, «Башланнган кадет хазырлылыкъ» дерследен тышында, окъуу курсда кадетле бирча тизилип барыргъа, автоматны чачып жыяргъа юйренедиле, «Жаш стрелокда» - илишаннга жаздырмай тюшюуню жашырынлыкъларына тюшюнедиле, «Битеулю физкультура хазырланыуда» - къарыуларын ёсдюредиле, маданият программалагъа кёре хорда жырлайдыла, тепсейдиле. Альбина Бжекшиева кадет школлада битеулю билим бергенлеринден сора да, сабийлени хар не жаны бла да айнытыргъа, аскерчи усталыкълагъа хазырларгъа кюрешгенлерин белгилегенди. Ол кадетле къыралыбызны чынтты инсанлары, сайлагъан ишлеринде устала боллукъларына, ала жашауда чыкъгъан чырмауланы буюкъмай ёталлыкъларына ышаннганын да айтханды. Жангыз да, ол эс бургъаныча, «Ата журтну къоркъуусузлугъун жалчытыу эмда къоруулау» деген дерсге бир сагъат къошаргъа керекди. Гилийланы Мурат а аланы ишлерини баш эсеплеринден бирине кадетле журтларын сакълаургъа хазыр болгъанларын, аны жалынчакъсызлыгъы ючюн кюреширге итиннгенлерин санагъанды. «Выпускниклени 63 проценти бийик усталыкъ билим берген учреждениялагъа киргендиле, ол санда аскер эмда Краснодарны, Нальчикни, Саратовну бла Москваны граждан вузларына да. Ала энчи аскер операциягъа да къатышадыла, бусагъатда школубузну бошагъан 31 инсан андадыла, кёргюзтген жигитлеклери ючюн аскерчи саугъала алгъанла да бардыла, биз ала бла ёхтемленебиз», - дегенди ол. Кадет школлада тёрели халда Аскер махтаулукъну кюнлерине, тарыхыбызны айтхылыкъ кезиулерине, уллу сермешлеге, Уллу Ата журт урушха аталып ингирле, тюбешиуле, байрамла къураладыла, аланы кеслерини музейлеринде десрле ётдюрюледиле. Жаш адамланы Курп бийикликлеге элтедиле, анда ала Хорламны байрагъын къууанчлы халда жаядыла, краеведение музейлеге бла аскер бёлюмлеге жолоучулукъла, Россейни Жигитлери, энчи аскер операциягъа къатышханла бла тюбешиуле эслеринде кёп жыллагъа къаладыла. 2021 жылда 3-чю кадет школда жаш тёлюню аскер-патриот жаны бла юйретиуню «Авангард» арасы ачылгъан эди, аны чегинде 10-чу классланы окъуучуларын жыл сайын жыядыла. Энчи жерни кадетлени сабий жамауат биригиулени, бек алгъа уа, «Биринчилени атламларыны» ишлерине къатышдырыу алады. Жыйылыуну эсеплерин чыгъара, палатаны башчысыны орунбасары Людмила Федченко ала бу сорууну энчи къарауда тутханларын айтханды. «Айныу барды, кадет школланы мюлк-техника хазналары игиленеди, устазланы ишлери жангы даражагъа чыгъарылгъанды, аланы айлыкъларына да къошула барады. «Сизде къуралгъан социал-маданият болум, кёп жылланы ичинде жыйылгъан уллу сынам, алгъадан тохташхан миллет, аскер-тарых эм патриот тёреле къыралыбызны патриотларыны жангы тёлюлерин ёсдюрюрге себеплик этедиле, ала уа ишлери, жетишимлери бла Россейни тамбласы бютюн жарыкъ болуруна, жашнарына болушурукъларына ишексизме», - дегенди ол. Кульчаланы Зульфия.
Поделиться: ЧИТАТЬ ТАКЖЕ:
|