Бу кюнледе Черек районну жаш тёлю арасында тёрт тилде чыкъгъан тёрт тизгинли назмула китабы бла шагъырей этиуге жораланнган жыйылыу болгъанды.

Жыйымдыкъгъа  Михаил Кильчичаковну орус, малкъар, хакас эмда тыва тилледе  назмулары киргендиле. Аланы малкъар тилге  Черек районну  школларыны ана  тилден бла адабиятдан  устазлары  Къубадийланы Мадина бла Батчаланы Танзиля  кёчюргендиле. Басмагъа уа   Хакасияда «Улуг Хуртуях тас»  музейни  илму къуллукъчусу Леонид Горбатов  эмда бизни  жерлешибиз Черкесланы Ислам  хазырлагъандыла. Аны басмалаугъа  Черек районну администрациясыны башчысы Къулбайланы Алан  себеплик этгенди.

Леонид Горбатов, жыйылыуда сёлеше, Къулбай улугъа жюрек ыразылыгъын билдиргенди, аны чыгъарыугъа юлюшлерин къошхан устазлагъа да ыспас этгенди.  «Насыпха, бусагъатда ана тиллени сакълаугъа эмда байыкъландырыугъа   регионланы башчылары, район таматала, алимле, устазла да уллу магъана бередиле. Бу китап тёрт тилде чыкъгъанлыкъгъа, малкъарлыла аны къайсы тилде окъусала да, ангыларыкъдыла. Нек дегенде бизни тилле бир бирге бек ушайдыла. Жыйымдыкъда назмула уа  сабийлеге халкъланы  адабиятларын бла маданиятларын, адет-тёрелерин да билирге, ангыларгъа болушурукъдула. Бек башы - барыбызны да орус тил  бирикдиргенине тюшюнюрюкдюле,- деп чертгенди ол.

Суратда: (онгдан солгъа)  Уяналаны Мурат, Черкесланы Ислам, Къубадийланы Мадина, Батчаланы  Танзиля , Батчаланы Анатолий.

Холаланы Марзият.