Къабарты-Малкъарны Жамауат палатасында жер-жерли самоуправление органлада улутхачылыкъгъа къажау кюреш къалай бардырылгъанын сюзгендиле. Жыйылыугъа палатаны башчысыны орунбасары Людмила Федченко, Прокуратураны улутхачылыкъны тыйыу жаны бла законодательствону толтуруугъа жууаплы прокурор Улбашланы Фатима къатышхандыла.

Былтыр бу жаны бла иш къалай къуралгъанын Май, Урван эм Элбрус районланы юлгюлеринде тинтилгенди. Палатаны жамауат къоркъуусузлукъ, законлукъну сакълау эмда ОНК бла байламлыкъла жюрютюу жаны бла комиссиясыны башчысы Азрет Шапсигов белгилегенича, бу осал шартдан кътулурча жумушлагъа инсала, жамауат биригиуле, граждан обещствону башха бёлюмлери да къатышыргъа тийишлидиле. «Халкъны право жаны бла билимин ёсдюрюу, бу жаны бла жарыкъландырыу ишни тамамлау да жетишимлеге келтирликди. Анга энчи эс бурургъа тийишлиди», - дегенди ол.

Кётюрюлген темагъа билдириулени Элбрус районну администрациясыны бёлюмюню башчысы Абдуллаланы Махмут, Май районну муниципал служба эмда кадрланы бёлюмюню баш специалисти Марина Беспалова, Урван районну право низамны сакълаучу органла бла байламлыкъла жюрютюу, улутхачылыкъны тыйыу эмда кадрла жаны ба бёлюмюню баш специалисти Артур Хавжоков этгендиле.

Аланы айтханларына кёре, сейирлери болгъан органлагъа эсгертиуле жарашдырылгъандыла. Алагъа кёре администрацияла норматив-право актланы улутхачылыкъгъа къажау излемлеге кёре тинтирге, бу жумуш бла кюрешген комиссияланы болгъан жорукъла тынгылы толтурурларына, алагъа бузукълукъ этилмезине къараргъа, жер-жерли самоуправление органланы улутхачылыкъгъа къажау ишлерини юсюнден жангылыкъланы, болжалдан кеч къалмай, туура этерге керекдиле. Андан тышында, улутхачылыкъгъа къажау законодательствону толтурууда ала жамауат биригиуле бла байламлыкъла тохташдырыргъа, профилактиканы бардырыргъа, ол ишге районлада жамауат палаталаны келечилерин къатышдырыргъа, адамланы оюмларын билирча соруула бардырыргъа тийишлидиле.       

Кульчаланы Зульфия.