Монополиялагъа къажау федерал службаны КъМР-де Управлениясы  ал кезиуде, тюрлю-тюрлю ведомстволагъа бойсуна, комитетге, министерствогъа бурула, бюгюнлюкде ол энчи служба болгъанды.

Ведомствону магъанасын, къаллай жумушла толтургъанын ангыламагъанла да бардыла.    УФАС-ны башчысы Анна Кумахова айтханыча, экономика заманны излемлери бла бирге тюрленеди, аны ючюн предпринимательлени законлу сейирлерин бла эркинликлерин сакъларгъа керекди. Монополиялагъа къажау службаны баш борчу олду. Алай бла  тийишли законланы жарашдырып, къабыл кёрюрге, аланы заманны излемлерине келишдирирге керекди.

Бюгюнлюкде къыралда монополиялагъа къажау беш  пакет  ишлейди.   Ол санда бизнесни цифралы излемлерин, цифралы рынокда ишлеген предпринимательлени къоруулау мадарла да бардыла.    

- Биз предпринимательлеге болушлукъгъа къуралгъанбыз. Бу борчларыбызны чеклеринде «Мой бизнес» ара бла келишимни проектин хазырлагъанбыз,   бу кюнледе анга къол салыргъа белгиленеди. Аны чеклеринде предпринимательлеге праволу болушлукъ этилликди: ангылатыу, билим бериу жумушла тамамланыллыкъдыла. Кертисин айтханда, бизнес бла кюрешгенле  законланы биледиле дерча тюйюлдю. Рекламаны, конкуренцияны юслеринден законланы излемлери уа къатыдыла. Аланы билмей бузгъанына да къарамай,  жууап тутаргъа тюшерикди,-дейди ол.

  УФАС къырал властьны  контроль-надзор органыды, болсада   профилактиканы сорууларына энчи эс бурабыз. Школчуланы, студентлени праволу билимлерин игилендириу артыкъда магъаналыды. Ол санда  «ачыкъ эшикле» жумушланы чеклеринде  управлениягъа къонакъгъа студентле келедиле, ведомствону иши бла шагъырейленедиле.

Дагъыда информация технологиялагъа юйреннген школчулагъа   монополиялагъа къажау билимни дерслери къураладыла. Ёсюп келген тёлю бла ангылатыу иш бардыра, келир заманда билимли предпринимательлени ёсдюребиз, дейди ушакъ нёгерибиз.  Аладан бирлери бизнес бла кюреширге деселе, кемчиликле этмей, заманларын зырафына къоратмай, законланы чеклеринде ишлеяллыкъдыла. Нальчикни 14-чю гимназиясында уа ФАС-ны къыралда жангыз классы ачылгъанды.      

  Службада  жамауат    эксперт совет да барды. Ол кенгешчи органды. Сёзге, орамлада, мекямлада реклама адамланы намысларын сындыргъаны бла къалгъаны даулашлы болса, сорууну советни келечилери бла бирге сюзюп, оноу  келишип чыгъарылады.  

 КъМР-де УФАС-ны  башламчылыгъы бла регионлада управлениялада жамауат советлени семинарлары болгъан эди. ФАС-ны башчысы   Максим Шаскольский анга ыразылыгъын айтханды.    Жамауат советни жыйылыуларындан бирине Сергей Платов да къатышханды. Ол РФ-де реклама бериучюлерини ассоциациясыны таматасыды.

  КъМР-де УФАС жамауат бла къурагъан байламлыкъла  юлгюлю болгъанлары белгиленип, бу  сынауну  башха субъектледе сингдирирге эсгертиуле этилгендиле.   

Анна Валентиновна айтханыча,  Управление право низамны сакълаучу органла бла байламлыкъда ишлейди. Монополияла бла байламлы законланы сакъламагъанлагъа  жууаплылыкъ Административ  бузукълукъланы кодексинде  белгиленипди.  Уголовный жууаплылыкъ да барды.  Сёзге, картель келишим этилгени тохташдырылса, материалла ич ишле органлагъа белгили этиледиле.   

 Продуктлагъа багъала тюрленселе, бирледен  ФАС къайры къарайды  дегенин эшитирге тюшеди.  Ведомствону башчысы ангылатханыча, рынок экономикада хар субъект да файда алыр ючюн ишлейди. ФАС а рынокну болумун тюрлендирирге боллукъ предприятиялада багъала къалай тохташдыргъанларына  контрольну тамамлайды. Сёзге, ынна тауукъчукъла тутуп, жумуртхаланы къалай   сатханы аны иши  тюйюлдю.

Бензинни юсюнден айтханда, къыралда аны жарашдырыу эм сатыу бла бир ненча компания кюрешеди. Ала багъаланы кеслери сюйгенлерича, бир тюрлю сылтау болмай  тюрлендирселе, битеу рынокда болум да анга кёре къураллыкъды. Аланы ишлерин федерал служба контрольда тутады.

Тикаланы Фатима