Къэбэрдей-Балъкъэрым и Iэтащхьэ КIуэкIуэ Казбек лэжьыгъэ IуэхукIэ хуэзащ КъБР-м ухуэныгъэмрэ псэу­пIэ-коммунальнэ хозяйст­вэмкIэ и министрым и къалэнхэр зыгъэзащIэ Журавлёв Андрей.

ЗэIущIэм щытеп­сэлъы­хьащ IэнатIэм мы зэманым ирихьэлIэу щызрагъэхъулIахэм, апхуэдэуи мы илъэсым къапэщыт къалэнхэм.
2024 гъэм ди щIыналъэм псэупIэу метр зэбгъузэнатIэ мин 611-м нэблагъэ зэрыщатар къыхагъэщащ, ар проценти 9,2-кIэ нэхъыбэщ абы ипэ ита илъэсым яхузэфIэкIам нэхърэ. Яухуащ фэтэр куэд хъу уни 141-рэ, псори зэхэту метр зэбгъузэнатIэ мин 240-м щIигъу хъууэ, ари процент 1,2-кIэ нэхъыбэщ илъэс ипэкIэ ятам нэхърэ. Уна­гъуэхэм яухуащ метр зэб­гъузэнатIэ мин 370-рэ зыу­-быд унэ 2725-рэ. 2023 гъэм ящIам нэхърэ процент 15,2-м щIигъукIэ нэхъыбэщ ар.
Ухуэныгъэ IэнатIэм лэжьыгъэу щызэфIагъэкIым проценти 7,2-кIэ хэхъуащ икIи ар сом мелард 43,6-рэ и уасэ ­хъуащ. Мыбы хохьэ лъэпкъ проектхэм япкъ иткIэ ирагъэкIуэкI ухуэныгъэхэр, ущып­сэуну дзыхьщIыгъуэджэ хъуа унэхэм цIыхухэр къыщIэгъэ­IэпхъукIыным, къалэдэсхэм  я тыншыпIэхэр къызэгъэпэ­щыным, фэтэр куэду зэхэт унэхэр къызыхуэтыншэу зэгъэпэщыжыным пыщIа лэ­жьыгъэхэр, нэгъуэщIхэри.
ПсэупIэ-коммунальнэ IэнатIэм щыIэ щытыкIэр егъэ­фIэкIуэныр къалэн нэхъы­щхьэхэм ящыщу къонэж мы зэманми. БлэкIа илъэсхэм «Псы къабзэ» щIыналъэ проектым ипкъ иткIэ зэфIагъэкIар мащIэкъым. Иджыпсту яухуэ Бахъсэн псы зэбгрышыпIэр икIи абы пыщIа ухуэныгъэхэр жылэ зыбжа­нэм занщIэу щрагъэкIуэкI. Мы зэманым ирихьэлIэу бжьа­мийуэ километр 50-м щIигъу далъхьакIэщ.
Дызэрыт илъэсым псэупIэу метр зэбгъузэнатIэ мин ­579-рэ ятыну, фэтэр куэду зэхэт унэу 66-рэ къызы­хуэтыншэу зэрагъэпэщыжыну, жылагъуэ зэхуэсыпIэу ­38-рэ зэIузэпэщ ящIыну я ­мурадщ. ЩIалэгъуалэ зэ­чиифIэхэм папщIэ Налшык къыщрагъэжьа уардэунэм, лышх уз зыпкърытхэм щеIэзэ республикэ диспансерым, Тырныауз псы зэрагъэкъабзэу дащIыхьым я ухуэныгъэ­хэми пащэнущ, нэгъуэщI лэжьыгъэхэри ирагъэкIуэкIынущ. Азау хуеймрэ Iуащхьэмахуэ къуажэмрэ яку дэлъ коллекторым и ухуэныгъэхэр зэфIэкIащ.
Мы гъэм и етIуанэ мазихым «Коммунальнэ Iэна­- тIэм епха инфраструктурэр егъэфIэ­кIуэн» къэрал про­ектым ипкъ иткIэ цIыхухэм псы яхуэу­тIыпщыным, къагъэсэбэпар къыIушыным пыщIа ухуэныгъэу 20 ящIынущ е зэрагъэ­пэщыжынущ. Абыхэм ящыщу 15-р мы гъэм зэфIагъэкIын хуейщ, адрей тхур дызы­хуэкIуэ илъэсым кърагъэу­быдэну къапэ­щытщ.
КъищынэмыщIауэ, респуб­ликэм и къалащхьэм дэт ­унэ­хэр, IуэхущIапIэхэр къызэ­рагъэхуабэ Iэмэпсымэхэр гъэ­плъыгъуэ лъэхъэнэм зэ­ры­хуагъэхьэзырыну щIыкIэми тепсэлъыхьащ.