Уллу Ата журт урушда Хорламгъа 80 жыл толгъанына атап, РусГидро компанияны Къабарты-Малкъарда бёлюмюню келечилери Хара-Хора тауну тёппесине ёрлеп, анда Хорламны Байрагъын эмда компанияны белгисин орнатхандыла.

Бу тау Басхан райондады, ол артыкъ бийик тюйюлдю, алай дагъыда 1233 метрге уа жетеди. Энергетикле, ала уа сегизеулен болгъандыла, ары юч сагъат ёрлегендиле.

«Бу жумушну биз, кеси жашауларын аямай, къыралыбызны, мамыр жашауну да сакълагъан ветеранларыбызгъа атагъанбыз. Биз ала этген жигитликни эсде тутаргъа, аны келир тёлюлеге да жетдирирге борчлубуз», - дегенди бёлюмню келечиси Андемир Бирсов.

Хара-Хораны энергетикле бошуна сайламагъандыла. Эм биринчиден,  бу тау 1942 жылда ётген къызыу сермешледен алай узакъда тюйюлдю. Башха жаны бла уа ол энергетиканы тарыхы бла да байламлыды: андан онеки километр арлакъда Басхан ГЭС турады. Уллу Ата журт урушну кезиуюнде, ол душманланы къолларына тюшмез ючюн, аны мекямларын совет сапёрла чачхандыла. Ызы бла уа, 1943 жылда, къачып баргъан немисли аскерле анга заран салгъандыла. Станция бек тозурагъан эди ол кезиуде, алай жангыртылып, бюгюнлюкде регионну электрокюч бла жалчытады.

Гидроэнергетикле дагъыда Хорламны кюнюнде Нальчикде Ёмюрлюк отха гюлле салып, аны аллында бир минутну шош сюелип, ол урушдан къайтмай къалгъан эмда жашаулары тылда юзюлген инсанларыбызны эсгергендиле. Компанияны бёлюмюнде уа «Ёлюмсюз полк» бардырылгъанды. Анда ишлегенлеге, къонакълагъа да ол кюн эсде тутууну, кишиликни эмда халкъны жигитлигини белгисин – Георгий тасмаланы юлешгендиле.

«Хорламны  кюню – ол,  эм биринчиден, эсде тутууду. Фронтлада уруш этген жигитлени, кеслерин аямай тылда ишлегенлени. Биз а, ол деменгили тёрени ызындан бардыргъанлача, ыразылыгъыбызны бла хурметлигибизни келир тёлюлеге къояргъа керекбиз. Гидроэнергетика тарых хазнаны сакълайды, къыралны айныууна бюгюнлюкде да къошумчулугъун этеди», – дегенди бёлюмню башчысы Игорь Кладько.

Улбашланы Мурат.