Уллу Хорламны кюнюнде Аманлыкъчыланы терсликлерине жолукъдуруу жаны бла федерал службаны КъМР-де Управлениясында къуллукъ этгенле республиканы шахарларында бла районларында эсгериу митингле къурагъандыла. Быллай жумушла Нальчикде бла Прохладныйде Уллу Ата журт урушну аскерчилерини эсгертмелерини къатында бардырылгъандыла. Байрамгъа дери уа аланы уголовный-толтуруучу системаны къуллукъчулары тынгылы жангыртханларын белгилерчады.

Биринчиден а, Управленияда къууанчлы жыйылыу бардырылгъанды. Ызы бла ведомствону мекямыны арбазында Хорламны Стеласыны къатында эсгериу жумушла ётгендиле. Бу эсгертмеде Уллу Ата журт урушну фронтларында душманнга къажау тургъан 60 батыр аскерчини аты жазылыпды. Ала барысы да республиканы инсанларыдыла, уголовный-толтуруучу системада ишлегенле.

Жыйылгъанланы байрам бла Управленияны башчысы Александр Демидов алгъышлагъанды. Ол къызыл аскерчиле дунияны фашизмден къутхаргъанларын, мамырлыкъны сакълагъанларын белгилегенди. «Биз ол къанлы къазауатда жан бергенлеге хурмет этебиз», - дегенди ол.

Стела мемориал комплексни бир кесеги болгъанын айтырчады. Эсгертмени саулай быйыл кюз артында битдирирге белгиленеди. 

Дагъыда ол кюн 844-чю мараучу полкну 3-чю миномёт ротасыны командири Василий   Бакаевни эсгертмесинде болгъандыла. Батыр аскерчи Къызыл Жулдузну ордени эм майдалла бла саугъаланнганды.

Андан сора да, ветеранла Андрей Угнич эм аны юй бийчеси Ольганы къабырларын жокълагъандыла. Ала экиси да душман бла къазауат бардыргъандыла, мамыр кезиуде уа КъМР-ни уголовный-толтуруучу системасында ишлегендиле.

Системаны къуллукъчулары Нальчикде «Ёмюрлюк от» мемориалны къатында бардырылгъан республикалы митингге да къошулгъандыла. Управленияны башчысы   Александр Демидов башхала бла бирге эсгертмеге гюлле салгъанды. 

Ата журтну къоруулаучуларын бир минут шумсуз туруп хурметлегендиле, деп билдиргендиле бизге ведомствону пресс-службасындан.

Тикаланы Фатима хазырлагъанды.