Россейде Парламентаризмни кюнюне аталып, КъМР-де ич ишле министр полицияны генерал-майору Вячеслав Крючков законла чыгъарыучу органны депутатлары бла тюбешгенди. Аланы профессионал байрамлары бла алгъышлап, хайырлы байламлыкъла ючюн ыразылыгъын айтханды, деп билдиргендиле ведомствону пресс-службасындан. 

 Ич ишле органлагъа салыннган борчланы тамамлауда себеплик этгенлери ючюн  Парламентни спикерини орунбасары Мурат Карданов, Жамауат къоркъуусузлукъ эм коррупциягъа къажау комитетни таматасы Михаил Кривко, Маданият, граждан обществону айнытыу эм цифралы политика жаны бла комитетни башчысы Текуланы Амырбий бла аны орунбасары Ранета Бжахова, Аграр соруула, табийгъатны хайырланыу, экология эм тёгерекдеги къудуретни сакълау жаны бла комитетни келечиси Алтууланы Аслан   ведомствону Сыйлы грамотасы эм министрни Ыразылыгъы бла   саугъаланнгандыла.

- Законла жарашдырыу власть къыралны мурдорун къурайды. Депутатла законла чыгъарыу башламчылыкъланы тамамларгъа, праволу системаны айнытыргъа себеплик этедиле. Бу жууаплы ишде жетишимле тежейме. Мындан ары байламлыкъла бютюнда хайырлы боллукъларына ишексизме,-дегенди министр.

Тикаланы Фатима хазырлагъанды.