Россейде тахта кёгетлени теплицалада ёсдюрген эм уллуладан бирине саналгъан «ЭКО-культура» холдин импортну алышындырыуда дайым мадар излегенлей турады. Алай бла кёп болмай Чегемде орналгъан «Чегем Агро» теплица комплексде тирликни жыярча гидравликасы бла арбачыкъланы хайырланып башлагъандыла. Аланы биригиуню специалистлери кеслери жарашдыргъандыла, деп билдириледи «Чегем Агро» комплексде.

Бюгюнлюкде сагъынылгъан техникадан 550-си чыгъарылгъанды. Ала 13 теплица комплекследе хайырланыладыла, ол санда Къабарты-Малкъарда да. Энчи арбачыкъланы томатла бла нашала жыйгъандан башха, битимлеге тийишли халда къарарча да жаратадыла.

- Арбачыкъла не жаны бла да тыш къыраллыныкъылагъа оздурмайдыла эм производствода изленнген сурамны толтурадыла. Ала адамны 5,5 метрге дери кётюредиле. Ол тирликни жыйгъанда эм башха жумушланы тамамлагъанда да бек болушады. Бюгюнлюкде тахта кёгетлени ёсдюргенден сора да, жангы технологияла бла оборудование чыгъарабыз, тюрлю-тюрлю жумушла автомат халда тамамланырча битимчиликни керек инфраструктура бла жалчытырча мадар этебиз. Теплица комплексни ишлетип башлагъаныбыз бла чекленип къалмай, аны не жаны бла да айнытырча къайгъысын этебиз, деп билдиргендиле биригиуде.

Алгъаракълада билдиргенибизча, «Чегем Агро» теплица комплексде импортну алышындырыу бла байламлы  битимлени букъуларын жайыуда Воронеж бла Тамбов областьланы фермаларында ёсдюрюлген сары чибинлени жетишимли хайырланып башлагъандыла.

Бюгюнлюкде «Чегем Агро» мюлк тахта кёгетле ёсдюрюу жаны бла Къабарты-Малкъарны эл мюлкюне жетишимли атлам болгъанын да энчи белгилерчады. Аны биринчи кесеги буруннгу жыл ишлеп башлагъанды. Анга кёре 37,6 гектарда жылгъа 20 минг тонна томат ёсдюрюледи.

Алай бла «ЭКО-культура» агропромышленный холдинг дйым производствосун ёсдюргенлей турады, ол санда Россейде бийик технологиялы теплица комплекслени къурарча инвестиция программаны бардырады. Жууукъ заманда кесини урлугъун жарашдыргъан   ара да ишлерикди. Биригиу "Урунууну производствосу" деген миллет проектге да къатышады, аны чеклеринде предприятияларында аяулу производство амалны сингдиреди. 

Эсге сала айтсакъ, быйыл апрельде Беларусь Республикагъа теплицалада ёсдюрюлген томатладан 24 тонна ашырылгъанды. Ол толусунлай карантин эм фитосанитар излемлеге келишген качестволу продукцияды. Бу жол республика томатланы Россейден тышына биринчи кере сатханын да энчи белгилерчады.

Курданланы Сулейман.