Кёп болмай Чегемде Хорламны паркы къууанч халда ачылгъанды. Мында Уллу Ата журт урушну Жигитлери Байсолтанланы Алимге,  Назир Канукоевге эм энчи аскер операциягъа къатышхан жерлешлерибизге аталгъан эсгертме комплекс жарашдырылгъанды. Аланы КъМР-ни халкъ художниги Станислав Катони ишлегенди, деп билдириледи Чегем  муниципал районну администрациясыны пресс-службасындан.

Байсолтанланы Алим Совет Союзну Жигити деген сыйлы атха  Къабарты-Малкъарда угъай, Шимал  Кавказда да биринчи  тийишли болгъанды.   Ол 1943 жылда Кронштадтны башында хауа сермешде жан бергенди. Назир Канукоев да эскадрильягъа башчылыкъ этгенди эм  кеси жангыз  жауну  14 самолётун агъызгъанды. 

Къууанчлы жыйылыугъа  жамауат эм жаш тёлю  организацияланы келечилери, жигитлени  жууукъ-ахлулары эм башхала  да къатышхандыла. Анда  Ата журтха сюймекликни, адет-тёрени эм да патриот сезимни кючлеуге  аслам эс бурулады деп кёп айтылгъанды. Сёз ючюн, былтыр Юйюрню, быйыл а Ата журтну къоруулаучуну жылы белгиленеди.

Ол кюн районну артистлери  Уллу Хорламны 80-жыллыгъына аталгъан  байрамда   Байсолтанланы Алимни бла Назир Канукоевни эм башха белгили жырланы айтып,  жыйылгъанланы кёллерин алгъандыла. Быллай акцияла халкъны бирикдиредиле эм жаш адамланы да патриот сезимлерин кючлейдиле.

Эсге сала айтсакъ, мемориалны магъанасы - Ата журтубузну къоруулагъанланы сыйларын кёргюзтгенден сора да,  тёлюлени бирикдириргеди.  Скульптурала жангы жамауат жерни ара майданында орналадыла. Парк -комплекс «Гитче шахарлада бла элледе иги болум къурау»  битеуроссей конкурсда хорлап,   «Жашау этерге   инфраструктура» деген миллет проектге кёре ишленнгенди. Ол тюрлю-тюрлю акцияла бардырылгъан, шахарчыла сюйюп солугъан жер боллукъду. Мында топ ойнаучу майдан, чабарча жолла, амфитеатр, скейт-парк эм гитче  архитектура  формала да бардыла.

Курданланы Сулейман.