КъМР-ни Къурулуш эмда жашау журт-коммунал мюлк министерствосундан билдиргенлерича, Нальчикде "Иги шахар болум къурау" миллет проектге кёре 2019-2024 жыллада 24 жамауат тийре игилендирилгенди. Аланы бир къауумун нальчикчиле жыл сайын бардырылгъан битеуроссей проектни чеклеринде тюзюнлей къол кётюрюу бла сайлагъандыла.

Сёз ючюн, былтыр Кешоков атлы орамда Эркинликни сквери айбатландырылгъанды. Ол шахарны арасында орналады эм жашил тийреге саналады. Мында XVIII-XIX ёмюрледе Кавказ урушда ёлгенлеге аталгъан эм Джабаги Казаноко бла аны юй бийчесини эсгертмелери да орналадыла.
Жангыртыу ишлени кезиуюнде былайда жашау журтланы арбазларын, сабий садны, Жаш къараучуну эм Гинжи театрланы арбазларын да тап халгъа келтиргендиле.

Быйыл Россейни Жигити Тимур Тамазов атлы орамда Каштан аллеяны да жангыртырыкъдыла. Аны былтыр онбеш минг нальчикчи тюзюнлей къол кётюрюу бла сайлагъандыла. Келир заманда ол шахарчыла эм къонакъла да солугъан эм заманларын зауукълу ётдюрген жерледен бири боллукъду.  Аны бла бирге жангы микрорайонну да айныууна ахшы себеплик этерикди.

Бу жол бешинчи битеуроссей проектни чеклеринде тюзюнлей къол кётюрюуге регионну ара шахарыны жети объекти чыгъарылгъандыла: Ленин атлы проспектде ачыкъ кёкню тюбюнде сквер-музей, Нальчикни эт комбинаты болуучу жер, Бирликни сквери, Мальбахов атлы орамда Шогенцуков атлы парк, 115-чи Атлы дивизияны сквери, Шогенов атлы орамда 18-чи номерли жашау журтну тийреси эм Осетин орамдан Идаров орамгъа дери кесегинде суу жагъаны кесеги. Алай бла чыгъарылгъан эсеплеге кёре, эм кёп къол кётюрюлген объектле экинчи жыл игилендирилирге тийишли тизмеге къошуллукъдула.  

Проектге онтёр жыллары толгъанла  къатышыргъа боллукъдула. Къол кётюрюрге уа 12 июньнга дери жарайды. Аны ючюн www.za.gorodsreda.ru сайтха кирип, «Платформа голосования» бёлюмде регионну, округну неда районну табып, анда жаратхан объектни сайларгъа керекди. Аны дагъыда Къырал жумушла порталда тамамларгъа боллукъду. Бу ишге къатышыргъа сюйгенлеге волонтёрла да болушурукъдула.

Курданланы Сулейман.