Налшык дэт Гимназие №I-м щекIуэкIащ илъэс къэс зэхаублэ «Рыцари закона» республикэ зэпеуэм и къалэ Iыхьэр. Iуэхум и мурад нэхъыщхьэр наркоманием пэщIэтынырщ, къытщIэхъуэ щIэблэр гъащIэ узыншэм хуэущиинырщ, щIалэгъуалэр хэкупсэу гъэсэнырщ, лей зехьэным, экстремизмэмрэ терроризмэмрэ пэIэщIэ щIынырщ.
Iуэхур къызэрагъэпэщащ Урысей МВД-м Налшык щиIэ управленэм, къалэм и щIыпIэ администрацэм ЕгъэджэныгъэмкIэ и департаментымрэ сабий, ныбжьыщIэ творчествэмкIэ центрымрэ. Абы хэтащ къалэ еджапIихым я класс нэхъыжьхэм щIэсхэм ящыщу 100-м нэблагъэ.
Утыку къихьахэм я зэфIэкIыр къилъытащ Налшык УМВД-м балигъ мыхъуахэм я IуэхухэмкIэ и инспектор нэхъыжь, полицэм и майор Хьэбэч Оксанэ, Наркотикыр зэрызэрагъэкIуэкIым кIэлъыплъынымкIэ управленэм и оперуполномоченнэ, полицэм и подполковник Давыдовэ Иринэ, КъБР-м щыIэ Урысей гвардием и управленэм и офицер, полицэм и майор Лыкъуэжь Маринэ, сабий творчествэмкIэ къалэ центрым и унафэщI ЗэкIуий Динарэ, «Пэрытхэм я зэщIэхъееныгъэ» щIыналъэ къудамэм и IэщIагъэлIхэу Бэлахъуэ Анзоррэ Бамбэсыр Темболэтрэ, Къэбэрдей-Балъкъэр къэрал ¬университетым хъыбар технологиехэмрэ экономикэмкIэ и колледжым и егъэджакIуэхэу Къармокъуэ Маритэрэ Нэгумэ Джульетэрэ зыхэта жюрим.
Гупхэм къагъэлъэгъуащ гъащIэ узыншэм къыхуезыджэ, наркотикым пэщIэт концерт, театр гъэлъэгъуэныгъэхэр.
Зэпеуэм кърикIуахэмкIэ нэхъыфIу къалъытащ Гимназие №1-м и гупыр, СОШ №32-м щеджэхэр етIуанэщ, ещанэ увыпIэр ялъысащ Гимназие №27-м щыщхэм. Мы Iыхьэм щытекIуахэмрэ призерхэмрэ иратащ Налшык къалэ администрацэм егъэджэныгъэмкIэ и департаментым и щIыхь тхылъхэр .
ЗэкIуий Динарэ жюрим хэтахэм фIыщIэ яхуищIащ нэхъыфIхэр къызэрыхахам, Iуэхур егъэкIуэкIынымкIэ къазэрыдэIэпыкъуам папщIэ икIи фIыщIэ тхылъхэр яIэщIилъхьащ. .
Мы зэпеуэм щытекIуахэр республикэ Iыхьэм хэтынущ.
КъызэгъэпэщакIуэхэм къалъытэ мыпхуэдэ Iуэхухэр балигъ мыхъуахэм папщIэ егъэкIуэкIын хуейуэ абыхэм я дуней еплъыкIэр зэтеухуэн, хабзэм тетын, апхуэдэуи жылагъуэм яхэзэгъэн папщIэ.
БАХЪСЭН Ланэ.
