«Единая Россия» «Хорламны диктантына» аталгъан кёрмючню къурагъанды. Быллай жумушла уа партияны регионлада бёлюмлеринде барысында да тамамланадыла. Кёрмючде акцияны тарыхыны, ол бардырылгъан жерлени юслеринден суратла бла шагъырей болургъа онг барды.
Диктант къуралгъан кезиуден бери анга къатышханланы саны 13 кереге, бардырылгъан жерле уа 20 кереге кёбейгендиле. Бюгюнлюкде бу тарых магъаналы жумушла 35 минг жерде къураладыла. Быйыл акциягъа 85 къырал къошулгъанды. Тенглешдириап айтханда, былтыр ала 61 эдиле.
Диктантны Россей бла шуёхлукъ жюрютген къыралла бла бирге къажау тургъанланы инсанлары да жазадыла. Партияны оноучулары айтханларыча, ол тарых кертиликни сакълауну амалларындан бириди. Быйыл а диктантны сорууларына энчи аскер операцияны тарыхыны юсюнден шартла да къошулгъандыла.
Кёрмючню юсюнден айтханда, ол «Тарыхны эсде тутуу» партия проектни чеклеринде къуралгъанды. Ол жаш къараучуну театрыны аллында ачылгъанды (Къабарты орам, 1-чи номерли мекям).
- Суратла бла хар адам да чырмаусуз шагъырей болаллыкъды, алада диктантны тарыхы шарт кёргюзтюледи. Быйыл а республикада диктантны 110 жерде жазгъандыла, анга 6 мингден аслам адам къатышханды. «Хорламны диктантын» Курп бийикликде да жазадыла – бу жерледе Кавказ ючюн къазауатны эм къанлы сермешлери баргъанлары белгилиди,-дегенди KABARDIN-BALKAR.ER.RU сайтны журналистлерине партия проектни регионда бардырыугъа жууаплы, «Единая Россияны» КъМР-де регион бёлюмюню толтуруучу комитетини башчысы Дмитрий Парафилов.
Тикаланы Фатима хазырлагъанды.
