Аруан щIыналъэм хыхьэ Псынабэ къуажэм дэт курыт еджапIэм иджыблагъэ къыщызэIуахащ къуажэдэс ­нэхъыжьыфI Къэгъэзэж Щамхьир и гъащIэмрэ и лэ­жьыгъэмрэ теухуа плIанэпэ. Абы щыплъагъунущ тхьэмадэм и сабиигъуэм щегъэжьауэ траха сурэтхэр, и Iэдакъэ къыщIэкIа тхылъхэр, дэфтэр зэмылIэужьыгъуэхэр. ПлIанэпэр хуабжьу яфIэгъэщIэгъуэнщ школакIуэхэм. БлэкIа лIэщIыгъуэм халъхуа нэхъыжьым и гъащIэ гъуэгуа­нэм куэд къыбжеIэ, лъэхъэнитI зэпещIэ икIи куэдым урегъэгупсыс. 

- Ди къуажэр зэфIэувэным, зиужьыным я гуащIэр халъ­хьауэ цIыху щэджащэ куэдым я цIэр къипIуэфынущ. Абы­- хэм ящыщщ гъащIэ гъуэгуанэ купщIафIэ къэзыкIуа, нобэми лъэрытет, зи ныбжьыр илъэс 90-м нэблэгъа Къэгъэзэж Щам­хьир. Абы и дуней тетыкIэр, лэжьыгъэр, Iущагъыр, IуэхущIафэхэр къыдэкIуэтей щIэблэм щапхъэ зытрахын защIэщ. КъищынэмыщIауэ, и ущие, чэнджэщ щхьэпэхэр щIалэгъуа­лэм зэхахыну сыт щыгъуи сэбэпщ. Абы къыхэкIыу, ди еджапIэм къекIуалIэ цIыкIухэр и деж щытши, езыр къыщедгъэб­лагъи къэхъуащ. Иджы къуажэдэс нэхъыжьыфIым къызэ­ринэкIа гъуэгуанэр сыт щыгъуи нэрылъагъуу диIэн папщIэ 2025 гъэм и мазаем къызэIутхащ плIанэпэр. Сабийхэм ялъагъу­ ар щылэжьа IуэхущIапIэхэр зыхуэдэр, лэжьыгъэм зэре­хъулIэу щытар, нэхъ пашэхэм, жыджэрхэм хабжэу IэнатIэр къызэрырихьэлIар, иIа щытхъухэр, къыхуагъэфэща да­мыгъэ лъапIэхэр, - жеIэ Псынабэ курыт школым и унафэщI Теувэ Иринэ. - КъищынэмыщIауэ, абы и цIэр щIыпIэ куэдым щызэхахащ. Лэжьыгъэм къыпэрыкIыжа нэужь, езым зэхилъ­хьэ удз хущхъуэхэмкIэ игъэхъужар щэ бжыгъэкIэ къыпхуэбжынущ. 
А хущхъуэхэр зэрызэхилъхьэм, зи сэбэпым теухуауэ къы­дигъэкIа тхылъыр, и сабиигъуэм щегъэжьауэ лIыпIэ иувэху къикIуа гъуэгур щитхыжа тхылъыр телъщ дапхъэм. Апхуэдэуи ди нэхъыжьыфIым теухуауэ республикэ газетхэм къытрадзахэр, игъэхъужахэм фIыщIэ псалъэу къыхужаIахэр щызэ­хуэхьэсащ. Ар щIэблэм хуабжьу яфIэгъэщIэгъуэнщ. 
Къэгъэзэж Щамхьир 1937 гъэм Псынабэ къуажэм къы­щалъхуащ. И къару илъыху IэнатIэ зыбжанэ ирихьэкIащ. Ар­уан районым и «Мэкъумэштехникэм» - IэщIагъэлIу, «Псынабэ» совхозым инженер нэхъыщхьэу щылэжьащ, Мэкъумэш Iуэхум хэтхэм я профсоюзым и Аруан район комитетым и тхьэмадэу щытащ, нэгъуэщI IэнатIэ куэдми и гуащIэ хилъ­хьащ. ЖыпIэнуракъэ, IэнатIэ гуэр дэхуэхамэ, ар къэIэ­тыжын хуеймэ, Щамхьир ягъакIуэрт. ИкIи унафэщIхэр къызэры­щыгугъыр жэуаплыныгъэ ин хэлъу игъэзащIэрт. Сыт хуэдэ Iуэху зрипщытми, фIыуэ къехъулIэрт, хыхьэхэкI иIэти, езыр цIыху гумызагъэти, зыхуэмышэрыуэ щымыIэу лIы щыпкъэ-ти. 
Щамхьир цIыхухэм яхуищIа Iуэхутхьэбзэм щIэи гъуни иIэкъым. Зи псалъэр ялъытэ, зи гупсысэр куу, зи гъащIэ гъуэ­гуанэр щапхъэ тхьэмадэм узыншагъэ быдэ иIэну Тхьэм жиIэ!

НэщIэпыджэ Замирэ, 
КъБР-м, АР-м щIыхь зиIэ я журналист.