Дуния башында саулукъ неден да багъалы болгъанын барыбыз да билебиз. Сёз сабийинги саулугъуну юсюнден бара эсе уа, бютюнда. Аны врачха элтирден алгъа эм иги специалистлени къайда болгъанларын сурап, билирге кюрешебиз. Аны ючюн а социал сетьлени да хайырланабыз. 

Кёп болмай КъМР-ни Саулукъ сакълау министерствосуну жамауат бла байламлыкъ жюрютген ТГ-каналында Быллым элни амбулаториясыны педиатры Къочхарланы Мухтарны къызы Маринагъа аналагъа ыспас сёзлерин жазгъанларын кёрюп, бек къууанама. Министерствогъа Маринагъа ыразылыкъларын билдирип жазгъан аналаны  бир ненчасыны айтханлары бла сизни да шагъырей этерге сюебиз. Ала быллымчы аналадандыла. 

Кёп сабийли Залийханланы Мадина жазгъаннга кёре, Маринагъа не заманда сёлешсенг да, ол болушмай къоймайды. «Аны эмда медсестрасы Тилланы Фариданы ахшылыкъларындан сабийлерибиз докторладан къоркъгъанларын къойгъандыла. Марина терен билимлиди, сабийлени саулукъларына тынгысыз болуп, жарсып барсакъ да, ол аурууну тюз тохташдырып, буюргъан багъыу амалы бла сабий терк къайтышады. Ашыкъмай, терен тинтиу бардырып, сабийни кеси кёрмеген заманында халындан толу хапар сурап, багъыуну алай башлагъанын бютюн бек жаратама». 

Этезланы Камила: «Ол къайсы сабийни да жюрегине къыйналмай жол таба билген фахмулу врачды. Ана жюрекни тынчайтып, къоркъууларына жолукъдурмай ашырады»,– деп жазады. 

Чеккеланы Зареманы сабийи  врачланы кёргенинде, къоркъуп, къылыкъ эте эди.  Марина Мухтаровнагъа уа биринчи тюбешиулеринден да сюйюп барады. Врач, биринчиден, сёзю бла багъа билирге керекди.Марина ма аллай врачды: керек болса, сабий тилде сёлеше, араларында жол ишлеу да биледи. Башха элледен да сабийлерин анга кёргюзтюрге келгенлерин билеме», – дейди ол.

Беш сабий ёсдюрген сынамлы ана Сепиланы Зульфиягъа 16 жылны ичинде кёп тюрлю врачланы кёрюрге тюшгенди.  «Кертисин айтсам, тюнгюлген окъуна этген эдим. Алай бизни элге Марина Мухтаровна келгенли жюреклерибизге сабырлыкъ тюшгенди. Анализле берирге иерден алгъа, тынгылы сурап, къыйнагъан заты бар эсе, анга бютюн терен эс бёлюп, алай ашырады. Сабийледен бири дарманны ичалмай, къусуп ийиучюдю. Анга да тюз багъыу амал табып, къысха заманны ичинде аякъландыра билген хунерли, намыслы, билимли докторгъа болмагъанча ыразыма», – дейди ана. 

«Адам кеси жеринде» дейдиле ишлерин ахшы билгенлеге. Къочхарланы Маринаны юсюнден да алай  айтыргъа толу эркинлигибиз барды. Адам улу ишлеген жеринде уллу махтаугъа, ыспасха да тийишли болса, ол иш усталыгъын бошуна сайламагъанын, анга къоратхан жылларын зырафына жибермегенин сезип, бютюн кёлленеди. Сёзсюз, хар врачха да саусузланы, аланы жууукъ-ахлуларыны  ыспас этгенлери неден да багъалыды.  Врачха айтылгъан махтау сёзле жалан аны кесин угъай, бизни да къууандырадыла. Миллетибизде ишлерин уста билген, аны бийик даражада тамамлагъан адамлары болгъанлары къадар, сабийлерибиз саулукълула болуп ёсерлерине ишексизбиз, деп айтыргъа эркинбиз.

Таппасханланы Аминат.