Бу кюнледе Сюд приставланы федерал службасыны Къабарты-Малкъарда управлениясы къурап, Уллу Хорламгъа жораланнган жортууул ётгенди.  Анга уа Чегем районну администрациясы, Управленияны Жамауат совети, «Шагди» ат-спорт клуб эм «Нальчик-Азимут» фирма да билеклик этгендиле. 

Атлыла  жолгъа Лячинкъаяда Уллу Ата журт урушда ёлгенлеге орнатылгъан эсгертмени къатындан чыкъгъандыла. Ала къыралыбызны немисли фашистледен къоруулай  жан берген аскерчилени къабырына гюлле салып, бир минут шош туруп эсгергендиле. 

Жортууул къаяла бла агъач ичи бла Басхан райондагъы «Высота - 910» мемориал комплексге эди. Бу эсгертме Нальчикни азатлай жан берген аскерчилени хурметлерине салыныпды. 

Ызы бла атлыла ич ишле органланы Уллу Ата журт урушда ёлген къуллукъчуларыны эсгертмесинде тохтагъандыла. Сюд приставланы федерал службасыны Къабарты-Малкъарда управлениясыны таматасы Бауаланы Ахмат быллай жумушланы бардырыу барыбызны борчубуз болургъа керекди, деп белгилегенди.

– Кеслерини юслеринден аз да сагъыш этмей, жауну ууатыуда жанларын, къанларын да аямай кюрешген аскерчилеге хурметибиз уллуду. Ала биз бюгюнлюкде мамырлыкъда ишлер, ёсер ючюн киргендиле къазауатлагъа, фашистлени ууатып, жерибизни азатлагъандыла, - дегенди Ахмат Каллетович.

Жортууул а «Шагди» ат-спорт комплексде патриот жырла бла бошалгъанды. Жыйылгъанланы алларында «Хрустальные звёздочки» Битеуроссей фестивальда хорлагъанла жырлагъандыла.   

Сюд приставланы федерал  службасыны Къабарты-Малкъарда управлениясыны таматасыны орунбасары Хусен Танашев, жортууулгъа къатышханлагъа ыразылыгъын билдирип:

- Сизни ётгюрлюгюгюз бла къыйыныгъыз бюгюннгю жумуш бийик даражада ётгенине себеплик этгенди. Ветеранларыбызны сыйларын кётюрюу, аланы хурметлеу барыбызны да борчубузду, - дегенди. 

Бу жортууул а биз аппаларыбызны жигитликлерин унутмагъаныбызны, къачан да аланы атларын эсибизде сакъларыгъыбызны белгисиди.

Таппасханланы Аминат.