ЩIэпхъаджащIэхэм иужьрей технологиехэр къагъэсэбэпурэ цIыхухэм зэре­дыгъуэм полицэр пэщIэт пэтми, бзаджащIэхэм я Iэмалхэм къахэхъуэ зэпытщ, цIыхухэм къазэрыгурыIуэнкIэ уепсалъэми, зэрыхъуар къахуэмыщIэу зыкърагъэгъапцIэ. КиберщIэпхъаджащIэхэм уазэрыпэщIэтынум теухуауэ «Къэбэрдей-Балъкъэр» радиом къыщыпсэлъащ Урысей УМВД-м Налшык щиIэ къудамэм и лэжьакIуэ, юстицэмкIэ лейтенант Созаевэ Алинэ. 

Управленэм дэлажьэ Жылагъуэ советым хэт, радиом и лэжьакIуэ Беслъэней Еленэ хабзэхъумэр къигъэпсэлъащ, иужь­рей зэманым къежьа бзаджагъэхэмрэ абыхэм уазэрыпэщIэтыфынумрэ я гугъу иригъэщIу. 
Созаевэм зэрыжиIэмкIэ, щIэпхъаджащIэхэм я Iэмалхэм къахохъуэ, махуэ къэс жыхуаIэм хуэдэу щIэ гуэр къагупсыс: зэм банкым и лэжьакIуэу, зэм хабзэхъумэу жаIэ. Нэхъыбэу цIыхухэр зэрагъэгужьейр «бзаджащIэхэм уи ахъшэр счётым ирахыну йоныкъуэкъури, псынщIэу нэгъуэщI счётым дгъэкIуэфынущ» жаIэурэщ. Ап­хуэдэхэм деж телефоныр телъхьэжын ­хуейщ, уемыпсалъэу, жаIэми уемыдаIуэу.
- Сытым дежи фигу ивгъэлъ: банкым и лэжьакIуэхэм фэ фыщымыту, фи Iэ щIэмылъу фи мылъкум теухуауэ зыгуэр ящIэну хуиткъым! Апхуэдэ IуэхукIэ телефонкIэ зэи нэпсэлъэнукъым. А зы закъуэр зыщывмыгъэгъупщэмэ, бзаджащIэхэм защыфхъумэфынущ. «Сэ апхуэдэ зэи къыс­щыщIынукъым, зыкъезгъэгъэпцIэнукъым», - жызыIэхэри къагъапцIэ, ди жа­гъуэ зэрыхъунщи. Ар елъытакъым IэщIагъэми, щIэныгъэми, губзыгъагъэми. ЩIэпхъаджащIэхэр цIыхум и гупсысэкIэм фIыуэ щыгъуазэщи, къызэрыхъуар умы­щIэу уи мылъкур пIэщIагъэкIыфынущ, - жиIащ хабзэхъумэм. 

Фырэ  Анфисэ.