КъМР-ни Башчысы Казбек Коков республиканы Саулукъ сакълау министерствосуну коллегиясыны жыйылыууна къатышханды, анда озгъан беш жылгъа алгъадан чыгъарылгъан эсеплеге эмда келлик заманда борчлагъа къаралгъанды.
Президентибиз Владимир Владимирович Путинни башламчылыгъы болгъан «Саулукъ сакълау» эм «Демография» миллет проектлени хайырындан арт бир талай жылны ичинде саулукъ сакълау бёлюмде аслам зат этилгенди.
Бек магъаналыладан бири саулукъ сакълауну биринчи звеносун тапландырыу программа болгъанды. Беш жылгъа 31 поликлиника бёлюмге тынгылы ремонт этилгенди, 7-си жангыртылыннганды эмда ишленнгенди, ол санда узакъ элледе да. 80 санитар улоу эмда жеринден тепдирирге боллукъ 10 комплекс, 300-ге жууукъ шёндюгюлю медицина оборудование да алыннганды. Саулукъ сакълауну цифровизация жаны бла да уллу иш тындырылады, андан сора да, медицина ишчилени усталыкъларын ёсдюрюу да.
Битеу бирге айтханда, тюрлениулени баш эсеплерини бири жашауну узунлугъуну ёлчемини кётюрюлюую болгъанды. Къабарты-Малкъарда 2024 жылда ол 77 жылдан асламды, орта россейли кёрюмдю 72,94 жылды.
Президентни «Узакъ эмда тири жашау» жангы миллет программаны санында программаны андан ары бардырыргъа эмда «Юйюр» жангы миллет проектни къураргъа оноуу регион саулукъ сакълауну андан ары айныууна стратегиялы магъаналыды. 80 чакълы бир объектде тынгылы ремонт бардырыллыкъды, аяулу технологияла, бийик технологиялы медицина болушлукъну жангы тюрлюлери сингдирилликдиле, мычымай болушлукъ тапдыргъан служба игиленирикди, саулукъ сакълауну биринчи звеносуну иши тапландырыллыкъды.
– Битеу ызлада иш андан ары бардырыллыкъды, борчларыбыз – халкъны сакълау, жашауну узунлугъун кёбейтиу, ёлюмню азайтыу, не жаны бла да саусузлагъа ырахат болгъан саулукъ сакълау системаны къурау.
Медицинада уруннганлагъа аланы усталыкълары, халкъны бла республиканы игиликлерине деп бардыргъан жууаплы эм къыйын ишлери ючюн ыразылыгъымы билдиргенме, - деп белгилейди КъМР-ни Башчысы кесини телеграм-каналында.
