Огъары Жемталада  Занкишиланы Кязимни атын жюрютген физкультура-саулукъландырыу спорт комплекс  ёсюп келген тёлю аслам жыйылгъан жерге саналады. Ары жашчыкъла, къызчыкъла да сюйюп жюрюйдюле. Аны сылтауу мен мында эки къауумуну да сейирлерине келишген секцияланы жетишимли ишлегенлеринде кёреме. Дзюдо эм стол теннис бла элли сабийле бютюн  сюйюп кюрешедиле. Аланы жангыдан-жангы хорламлагъа кёллендиргенле уа, сёзсюз, тренерлеридиле. 
Элге баргъан кюнюбюзде спорт комплексге башчылыкъ этген Занкишиланы Батыргъа тюбеп, ушакъ этгенме. Спорт бла ол сабийлигинден бери кюрешип келеди. Стол теннисге жюрюгенлени да кеси юйретеди.  Спорт бла кюреширге аны белгили тренер Занкишиланы Къубадий кёллендиргенин да айтады. 

- Анга дери мен эркин тутушуу бла кюрешип тургъан эдим. Ол заманлада бюгюнча онгла жокъ эдиле. Жарау этерча клубну фойесинде жер бёлген эдиле да, анда кюрешиучю эдик. Башындан тытыры агъа, аны уа ким алгъа келсе,  ол сыйпап кетергенди.  Артда, 2014 жылда уа, бу комплекс ачылады. Занкишиланы Къубадий айтып, мен педагогика колледжни физкультура бёлюмюне да  киреме. Ол алгъа къарай билген, ишин сюйген адам эди. Аллай юлгю аллынгда болгъан къадарда, сен осал специалист болургъа эркин тюйюлсе, -дейди ушакъ нёгерим. 

Колледжден сора Батыр Ахмадьяевич 10 жылны эл школда да ишлегенди. Алай эки ишни бардырыу тынч болмагъаны себепли, анга устазлыкъны къояргъа тюшеди. 

Бюгюнлюкде стол теннисге юйренирге бери асламында къызчыкъла жюрюйдюле. Таматалары бла ала тюрлю-тюрлю республикалы эришиулеге къатышып, алада алчы жерле алып къайтадыла. Андан тышында, элде да тюрлю-тюрлю байрам кюнледе, къонакъла да чакъырып, жемталачыла усталыкъларын кёргюзтедиле.  

- Билемисиз, бизни районда стол теннис алгъын кенг жайылып эди. Эл командала кеси арабызда да эришиуле бардырып тургъанбыз. Сора бир жол манга районну атындан эришиулеге къатышхан къызчыкъла жокъдула, секция ачсанг эди, дейдиле. Ма андан бери спортну бу тюрлюсюне кёчюп, школчула бла кюрешип башлайма. Алгъын школланы араларында спартакиадала бардырылыучу эдиле. Алада да аман кёрюмдюле болдурмагъанбыз, - дейди Занкиши улу.

Жанындан къарагъанда, стол теннис артыкъ къыйын кёрюнмейди, алай, бюгюннгю жигитим белгилегенича, тынгылы ракеткала, столла да алай учуз турмайдыла. Аланы хар кюн эмда эришиуледе хайырланылгъанланы башхалыкълары бек уллуду. Аны себепли учуз тюрлюсюнде юйренип, эришиуледе уа башха стол эмда ракетка бла хайырланыргъа тюшеди. Инвентарьны тап хайырлана билиу бла хорлам къаты байламлыдыла.

- Ракеткаланы 14 минг сом тургъанлары бардыла. Аланы юслериндеги резинлерине кёре бурулады топчукъ да. Хорлам да анга кёре келеди. Ма шёндю  Сабий лиганы республикалы эришиуюнде 5 къызым да 2-чи жерге тийишли болгъандыла. 11 команданы араларында ол аман кёрюмдю тюйюлдю, деп сунама, -дейди Занкиши улу.

Ол педагог болгъаны себепли, сабийлени спортха кёллендирген тышында, къызчыкъланы кеслерин жюрютюрге юйретиуге да эс бурады, миллетибизни ахшы адет-тёрелерин да эсге сала-сала турады. «Спортда аланы хар бири да жетишимли боллукъду деп айтыргъа къыйынды, алай ариу къылыкълылай къалыргъа, иги окъургъа итиниулюлюклерин тас этмезге  аланы кёллендиргенлей турургъа керекди»,- деп оюмлайды. 

- Школда окъуп, юйренип да тургъан къызла бюгюнлюкде ара шахарлада бийик билим берген окъуу юйледедиле. Алада да айырмалыдыла. Телефон бла жетишимлерини юслеринден билдиргенлей турадыла. Биз да мында къууанабыз алагъа. Ма аллай аламат тёлюню ёсюуюне аз да юлюш къошханым ючюн кесими насыплыгъа санайма. Жаш адамларыбыз билимлиле, жетишимлиле болурларын бек сюеме, - дейди Занкиши улу.

Башда чертгенимча, спорт комплексде тутушуу жаны бла да юйретедиле. Спортну бу тюрлюсюне элде бек уллу магъана бериледи. Айтхылыкъ дзюдочу Занкишиланы Казбекни (жаннетли болсун) жетишимлилиги кёплеге ахшы юлгю болгъанды. Тренерле Жангоразланы Хаким бла

Ксаналаны Аслан да ёсюп келген тёлю спортну бу тюрлюсю бла кюрешип, эллилерин къууандырырча этиуге уллу къыйын саладыла. 

- Билемисиз, Казбек бек ачыкъ жюрекли, тенглерин, сабийлени да къууандырыргъа сюйген жаш эди. Ол хар хорлам болдургъаны сайын мында кёплени саугъала бла къууандыргъанлай тургъанды. Сабийлеге бир заманда къуру къол бла кирмегенди. Стол теннисден къызчыкъла бла эриширге да бек сюйюуючю эди. Жашланы кёбюсюнде да ол саугъалагъан  спорт кийимле бюгюнлюкде да бек сыйлы затлача сакъланыпдыла. Биз да аны аты унутулмаз ючюн къолубуздан келгенни аярыкъ тюйюлбюз, - дейди Батыр Ахмадьяевич.