Жаш тёлюню юйюнде «Жаш профессионалны школу» проект кесини ишин бошап, эсеплери чыгъарылгъандыла. Аны автору КъМР-ни Жаш тёлю арасыны информация-медиа проектлени жашауда бардырыу эмда муниципалитетледе жаш адамла бла ишлеу бёлюмюню башчысы Атмырзаланы Аминады.
Проект къалай ишлегенини юсюнден биз сизге билдире тургъанбыз. Аны баш борчу тири студент къауумну келечилеринде жер-жерли самоуправленияны ишине сейирлерин ёсдюрюу эди. Дагъыда анга 25 жыллары толмагъан жаш специалистле да къатышыргъа боллукъ эдиле.
Амина Расуловна билдиргеннге кёре, ала биринчи тюбешиуден башлап жаш тёлю школну ишине тири къатышадыла эмда беш ыйыкъны ичинде къауум болуп ишлей, жыйылгъанланы алларында сёлеше билирге юйреннгендиле. Ай бла жарым заманны ичинде жаш тёлюге аланы жашауларында къачан да хайырлы боллукъ тренингле бардырылгъандыла.
Школну экспертлери уа «Кавказлы жаш тёлю тренинг ара» коммерциялы болмагъан биригиуню таматасы Екатерина Борисевич, СКФО-ну Рестораторларыны бла отельерлерини ассоциациясыны башчысы Гузеланы Индира, халкъны аллында сёлеширге юйретиу жаны бла специалист Юлия Овдиенко болгъандыла.
– Аладан сора да, ол кезиуде окъуучулагъа кеслерини сынамларындан билдириуле этерча къонакъла да чакъырылгъан эдиле. Ала бюгюнлюкде не затлагъа эс бёлюрге кереклисини юсюнден айтхандыла, соруулагъа жууапла да бергендиле, - дегенди Атмырзаланы Амина.
Къонакъланы араларында РФ-ни Къырал Думасыны VIII чакъырылыууну депутаты Виктория Родина бла КъМР-ни Башчысыны кенгешчиси Николай Миронов да бар эдиле.
– Проектге къатышханла бла тюбешиуюбюзню бек жаратханма. Аны юсю бла биз къыралыбызгъа, регионубузгъа да хайыр келтирлик жаш адамланы ачыкълаяллыгъыбызгъа бек къууаннганма. Быллай тири эмда жууаплы жаш адамла бек керекдиле. Управлениягъа, бизнесге, политикагъа барыргъа хазырлаугъа керекли онгла да къураллыкъдыла мындан ары. Биринчи атламланы къалай этерге кереклисини юсюнден сёлешген эдик да, ол алагъа сейир болгъаны къууандыргъанды, - деп чертгенди Николай Михайлович.
Виктория Родина уа жаш адамладан башлагъан ишлерин жарты къоймай, ахырына жетдирирлерин тежегенди.
– Быллай грант проектни жаш тёлюге хунерлерин ачыкълар онгла бергенин бек жаратханма, ол аламатды. Нек дегенде аны бла жангы жолла ачыладыла, жаш адамланы, абаданланы сынамларындан юлгю алып, кеслерини башламчылыкъларында хайырланыр амаллары боллукъду. Россейни, Къабарты-Малкъарны да тамблагъы кюнлерин быллай жашла бла къызла къурарыкъларын энтта да чертип айтыргъа сюеме. Быллай тюбешиуледе анга къатышханланы сейирлери болгъанын кёрсенг, андан уллу саугъа жокъду, - дегенди ол.
Проектни автору Атмырзаланы Амина кеси да ахшы юлгю кёргюзтгенледен бириди. Былтыр Жаш тёлюню ишлери жаны бла федерал агентствону грантла конкурсунда хорлап, бюгюнлюкде проектин жашауда бардырады.
– КъМР-ни Жаш тёлюню ишлери жаны бла министерствосуна, «Эльбрус» корпоратив университетге эмда КъМР-ни Жаш тёлю арасына манга бу проектни тийишли даражада ётдюрюрге болушлукъ этгенлери ючюн энчи ыразылыгъымы билдирирге сюеме, – дегенди Амина Расуловна.
Таппасханланы Аминат
