ЩоджэнцIыкIу Алий и цIэр зезыхьэ Къэ­бэрдей драмтеатрым щы­зэ­хэ­тащ «1941-1945 гъэхэм екIуэ­кIа Хэку зауэшхуэр: зэманым упхыплъыжмэ» лIыхъужьыгъэ-хэкупсэ зэхы­хьэр. Абы кърихьэлIащ щIэныгъэлI­хэр, къулыкъущIэхэр, тхы­-дэ­джхэр, жылагъуэ зэ­гу­хьэ­ны­­гъэхэр, щIалэгъуалэ гупхэр, СВО-м и ветеран- хэр, журналистхэр. ЗэIущIэм щы­­теп­сэлъыхьащ тхыдэ щIэи­­ным мыхьэнэшхуэ зэри­Iэм, абы и пэжыр щIэблэм ягурыгъэIуэн зэ­рыхуейм. Ар щIэблэ хэкупсэ зэрыбгъэсэным и зы хэ­кIы­пIэщ. Зэхыхьэр къызэ­ра­гъэ­пэщащ Урысейм и ­дзэ-тхы- дэ зэгухьэныгъэм (РВИО)  и щIыналъэ къудамэмрэ ­КъБР-м ЩэнхабзэмкIэ и министерствэмрэ. 

Ягу къагъэкIыжащ къэралым и тхыдэ напэкIуэцIхэм зэман хьэлъэу къыхэна 90 гъэхэр. Къэпсэлъахэм гулъы­тэ щхьэхуэ хуащIащ Хэку зауэшхуэм и тхыдэр зыгъэут­хъуэну, иужь итхэм апхуэдэ щIэпхъаджагъэр яхуэбдэ зэ­ры­мыхъунум. 
ЗэIущIэр къыщызэIуихым, КъБР-м щэнхабзэмкIэ и министр Къумахуэ Мухьэдин абы кърихьэлIахэм захуи­гъэ­защ:
- «Хэку зауэшхуэр: зэманым упхыплъыжмэ» зэхы-хьэр щIэныгъэ зэIущIэ къудей­къым. Ветеранхэр, тхы­дэ­джхэр, щIэныгъэлIхэр, щэнхабзэм и лэжьакIуэхэр, щIа­­лэгъуалэр зэкъуэуващ тхыдэм и пэжым и телъхьэу. Ди къэралым и цIыхухэм, ди нэхъыжьхэм Хэкум пап-щIэ зэрахьа лIыхъужьыгъэм ди щIэблэр щыгъэгъуэзэ­нымрэ абы щIэпIыкIынымрэ щхьэж ди гуащIэ хэтлъэну ди къалэнщ. ЩIэблэм я гу­п­сы­сэр зэтеува зэрыхъунумкIэ  дэ, балигъхэм, жэуап   дохь. 
Министрым и гупсысэр диIыгъащ КъБР-м и Парламентым щэнхабзэмкIэ и комитетым и унафэщI Текуев Амырбий.
- Бийм ди тхыдэр игъэулъиину иужь щиткIэ, совет сэ­лэтым и щIыхьым къыщебгъэ­рыкIуэкIэ, дэ абыхэм ерыщу дапэувын хуейщ, яхуэддэ ­хъунукъым я Iуэху фIейхэр. Дэ пэжыр къыдогъэлъагъуэ дэфтэрхэмкIэ, бжыгъэхэмкIэ, гукъэкIыжхэмкIэ щыхьэт дытехъуэжурэ. Ди нэхъыжь лъапIэхэм я лIыгъэр зэи ­тщыгъупщэ хъунукъым, Хэку зауэшхуэм и пэжыр нэхъы­щIэхэм зыхедгъэщIыкIын      хуейщ, - жиIащ абы.
ЗэIущIэм къыщыпсэлъащ Гуманитар къэхутэныгъэхэмкIэ Къэбэрдей-Балъкъэр институтым курыт лIэщIы­гъуэмрэ иджырей тхыдэмкIэ и къудамэм и лэжьакIуэ   ­Абазэ Алексей.
- Хэку зауэшхуэм и тхыдэм дыщыгъуазэ къудей мыхъуу, зыхэтщIэн хуейщ ди хуиты­ныгъэм зи псэ щIэзытахэм ягъэвар. Уасэшхуэ щIатащ ТекIуэныгъэм. Дэ къалэн ди­-Iэщ Хэку зауэшхуэм и пэжыр тхъумэну, ди щIэблэм яже­тIэну. Апхуэдэ щIыкIэкIэ пцIым зыщытхъумэфынущ, - жиIащ абы.
ЗэIущIэм хэтхэм зи гугъу ящI Iуэхугъуэр я лэжьыгъэм къызэрыжьэхэуэмрэ Iэмалу къагъэсэбэпхэмрэ теухуауэ къэпсэлъащ ЕгъэджакIуэ-хэм я щIэныгъэм зэпымыууэ ­щыхагъахъуэ центрым и уна­фэщI Къэжэр Артур. 
«Пэрытхэм я зэщIэхъее­ныгъэ» урысей зэгухьэныгъэм и Къэбэрдей-Балъкъэр къудамэм и унафэщI Шыпш Аслъэн и жыIэм къыхигъэщащ щIалэгъуалэм я хьэл-щэныр псыхьа хъунымкIэ нобэ ирагъэкIуэкI Iуэхухэм хуэдэхэм мыхьэнэшхуэ зэ­раIэр.
Украинэм щекIуэкI дзэ Iуэху хэхам щыIахэр, СВО-м и ­лIыхъужьхэр зэIущIэм къы­щып­сэлъащ. «Хэкум и хъума­кIуэхэр» къэрал фондым и щIыналъэ къудамэм СВО-м щыIахэм, щыIэхэм, абыхэм я унагъуэхэм зэрадэIэпыкъур къызэзыгъэпэщ ПщыхьэщIэ Ахьмэд мащIэу игугъу ищIащ зауэ гъуэгуанэм и нэгу щы­щIэкIахэм. 
- Сэ сыщIапIыкIащ Хэку ­зауэшхуэм и лIыхъужьхэм я хъыбархэм. Дауи, ахэр щапхъэ схуэхъуащ. СВО-м щыIэ щIалэ хахуэхэм ноби яды­золъагъу Хэкур хъумэным теухуауэ я къалэныр къимы­кIуэту зэрагъэзащIэр, къэ­ралым хуаIэ лъагъуныгъэр. Нобэрей зауэлIхэм щапхъэ яхуэхъуащ Хэку зауэшхуэм лIыгъэ щызыгъэлъэгъуахэм я хъыбархэр, - жиIащ абы.
Зэхыхьэм щагъэлъэгъуащ «Битва за Кавказ: непокорённый хребет» фильмыр. Ари совет сэлэтхэм яхэлъа ха­хуагъэм щыхьэт техъуэ лэжьыгъэщ.

  ГУГЪУЭТ  Заремэ.
Сурэтхэр
Къарей Элинэ трихащ